Бүгін, 29 желтоқсан 2022 жылы Қостанай қаласында облыстың үздік мәдениет және өнер қызметкерлерін, шығармашылық ұжым жетекшілерін жыл сайынғы өтетін «Тобыл-Торғай таланттары» рәсімінде марапаттады.
Жыл сайын облысымыздың белсенді мәдениет қызметкерлерін, өнерлі өнерпаздарын марапаттау дәстүрге айналған. Аталмыш шара облыстық Мәдениет басқармасының қолдауымен, облыстық көркемөнерпаздардың халық шығармашылығы мен кинобейнеқор орталығы ұйымдастырумен өтті.
Жыл айрығында өтіп бара жатқан жыл қандай жобаларымен есте қалды, көпшілікке не бере алдық деген сауалды әр адам өзіне қояры сөзсіз. Қостанай облысында кең ауқымды жобалар, байқаулар, әрине, облыстық Мәдениет басқармасының қолдауымен, тікелей ұйымдастыруымен жүзеге асатыны белгілі. Атқарылған істер жайында облыстық мәдениет басқармасы басшысының орынбасары Сәуле Әзімжанова айтып, тоқтала кетті.
Биыл «Дала Fest Qostanai» шығармашылық марафоны қолға алынып, жаз бойы қалалықтарға көңіл-күй сыйлады. Оған өңірдің қала мен аудандарынан келген өнерпаздар қатысып, елдің ыстық ықыласына бөленді. Бүгінгі «Дала Fest Qostanai» шығармашылық марафонына қатысып, көрігін қыздырған қалалық, аудандық мәдениет бөлімдерінің басшылары марапатталды.
Сонымен қатар шығармашылық марафонына қатысқан жеке ұжымдар мен өнерпаздар да өз бағаларын алып, марапатқа ие болды.
Бір адам өнер көрсетіп жатса да сахна сыртында көптеген адам сол концерттің жоғары деңгейде өтуіне еңбек етеді. Осы шараның өтуіне үлестерін қосқан «САЯБАҚ-2018» атқарушы директоры мен саябақтың дыбыс операторы марапатталды.
Ахмет Байтұрсынұлының 150 жылдығына арналған төс белгі бірнеше азаматтарға табысталды.
Еліміздің талантты жастары тек Қостанай облысында ғана емес, халқаралық байқауларда да үздік өнер көрсетіп, жүлделі орындармен бізді қуантып келеді. Бүгінгі шарада республикалық және халықаралық байқаулардың жеңімпаздары да марапатталды.
Іс-шара барысында өңіріміздің талантты әншілері ән айтып, бишілері мың бұрала би биледі.
Келер жыл барлығымызға құт береке әкелсін. Жеңісті жемісті күндеріміз көп болғай.
