Бүгін І.Омаров атындағы Қостанай облыстық қазақ драма театры халыққа толды. Дәстүрлі әнді сүйетін қалың қауым әнші, жыршы, термеші, қобызшы, республикалық байқаулардың лауреаты Қыдырбек Қиысханның "Байрақты елім – байтақ елім" атты шығармашылық кешіне жиналды.
Шығармашылық концерт көрерменін ерекше әсерге бөлеп, ұлт өнерінің қайнарынан сусындатып, көңілді шалқытып, рухты асқақтатты.
Өнерпаздың ән-жыр думаны облыстық мәдениет басқармасының бастамасымен, облыстық көркемөнерпаздардың халық шығармашылығы мен кинобейнеқор орталығының ұйымдастыруымен, "Ерулік" облыстық форумы аясында дарынды қандастарды қолдау мақсатында ұйымдастырылып отырғанын айта кетейік.
Қыдырбек Қиысхан кәсіби өнерпаз болмаса да, нағыз тума талант. Олай дейтініміз бала жастан айтыс, өнер сайыстарынан қалмай өзінің таудай талабының арқасында өнерде жүрген алдындағы ағаларын ұстаз тұтып, көп дүниені үйренген.
Қыдырбек Қиысханұлының облысымызда жыл сайын өтетін «Жас тұлпар» оқушылар айтысы байқауының тұңғыш жеңімпазы екенін ескереміз.
Бүгінгі кешінде өмірдегі, өнердегі ұстаздарының есімін атап, алғысын білдірді. Осы жолға жетелеген алдымен әкесі Қиысхан Мұғражұлы болса, одан кейінгі ұстазы белгілі меценат Жазит Құдайқұл, академик Зұлқарнай Алдамжарұлы, журналист Сәлім Меңдебайлар еді. Одан қалды осы термешілік, жыршылық өнерге баулыған белгілі дәстүрлі әнші Манапбек Кәдіров, ал қобызды ойнауға үйреткен белгілі қобызшы Батырбек Байназаров.
Кеш барысында «Ғалия», «Балқадиша», «Гаухар тас» сынды әндер нақышына келтіріліп орындалып, қобызда «Тәтіқара жыраудың толғауы» шығармасының тұсауы кесілді.
Кеш иесін құттықтап өнерсүйер қауым келді. Облыстық мәдениет басқармасының басшысы Ерлан Қалмақов Қыдырбек Қиысханды құттықтап, Алғыс хат табыс етіп, иығына шапан жапты.
