Рудный қаласында Мәдениет және өнер қызметкерлерінің алғашқы форумы өтті.
Бұл Рудный қалалық мәдениет бөлімінің басшысы Жанат Мырзабаевның бастамасымен қолға алынған алғашқы шара. Рудный қаласы әкімінің орынбасары Азамат Ысқақов пен облыстық мәдениет басқармасы басшысының орынбасары Сәуле Әзімжанованың қатысуымен өткен форумда мәдениет бөліміне қарасты ұйым басшылары өткен тоғыз айға есеп берді. Алға қойған шығармашылық мақсаттарымен, жоспарларымен бөлісті.
Облыс орталығынан келген облыстық мәдениет басқармасының және облыстық көркемөнерпаздардың халық шығармашылығы мен кинобейнеқор орталғының басшылығы қаланың мәдениет нысандарын аралап, жұмыстарымен танысып, алқалы жиында өз ойларымен бөлісіп, бағыт бағдар бере отырды. Мысалы, қалада ұлттық шығармашылық өнер кенжелеп қалған. Оған қоса бұл салаға әлі де болса жас мамандар керек.
— Аталмыш форум алғаш рет өтіп отыр. Бүгін көп мәселе көтерілді. Бір жағынан өзіміз де есеп беріп отырмыз. Облыс орталығынан келген басшылардың тарапынан айтылған ұсыныстар мен ескертпелерді қабылдап, келешекте түзетіп, орнын толтырып, сол бағытта жұмыс істемекпіз. Біріге отырып жұмыс істесе шешілмейтін мәселе жоқ екені белгілі. Бұл біздің алға қойған мақсатымыз бен жоспарымызды айқындай түсері сөзсіз, — дейді қалалық мәдениет бөлімінің басшысы Жанат Мырзабаева.
Форум аясында мәдениет саласына енді келіп, еңбек етіп жатқан жас мамандар таныстырылып, өнерлерін көрсетті. Кеш соңында мәдениет саласының ардагерлері көп жылғы еңбектері үшін Алғыс хатпен марапатталды. Соның ішінде ерешке еңбегі үшін, «Жадыра» ансамбльінің белді мүшесі, қала тұрғыны, Ахмет Байтұрсынұлының еңбегін зерттеп, насихаттып жүрген Жақсылық Кәкенов облыстық мәдениет басқармасының басшысы Ерлан Қалмақовтың арнайы Алғыс хатымен марапатталып, облыстық көркемөнерпаздардың халық шығармашылығы мен кинобейнеқор орталғының басшысы Дәмер Қалқаев табыс етті.
