Алтынсарин ауданында елімізге танымал жыршы, термеші, композитор Нағашыбай Алпысовтың «ЖЫР ҚҰЛАГЕРІ» атты лекция-концерті өтті.
Нағашыбай Алпысовтың орындауындағы Нұрхан Ахметбековтың «Торғайдан сәлем» толғауы 1985 жылы Алматы қаласында өткен ақындар айтысы мен жыршы-термешілер арасындағы фестивальде шырқалды.
Бұл ағамыздың өнер жолындағы жұлдызын жарқыратып, елге танылып көрермен көзайымы болуына себепкер болды. Кеш иесінің жыр-термені насихаттап, еңбек етіп жүргеніне 40 жыл. Тобыл-Торғай төрінің құрметіне бөленіп, «Жыр құлагері» атанған, қарт Торғайдың тумасы Нағашыбай Алпысовты және елу жыл бірге отасып келе жатқан Нағашыбай Алпысовтың асыл жары - Күлаш Мұхтарқызы бүгінде мәуелі бәйтеректей отбасы.
Кеш барысында Нағашыбай әкеміз ұлы өнер қайдан дарығанын, өмір жолы жайында жылы естеліктерімен бөлісіп отырды.
Ең алғашқы орындаған «Таңатқан палуан», Нұрхан ақынның «Торғайдан сәлем», шығармалары, «Құлагер» поэмасы жайында әңгімелеп, балалары орындап берді.
«Қаншеңгел» поэмасының әуенін қалай жазғанын да айта отырды.
Кеш төріне арнайы келіп отырған ел ағалары мен мекеме басшылары тілек-лебіздерін білдірді. Алтынсарин ауданы әкімінің орынбасары Әділбек Сарин аудан әкімінің Алғыс хатын табыстап, иығына шапан жапты.
Алтынсарин аудандық ардагерлер кеңесінің төрағасы Жандарбек Сеитов, ақын, жазушы Серікбай Оспанов, белгілі меценат Ибраш Естаев және айтыстың ақтаңгері Айбек Қалиев те құттықтай келіпті.
Осындай кездесу кеші тек аудан деңгейінде ғана емес, киелі Торғай жерінде, облыс орталығында өтсін деген ұсыныстар айтылды. Одан қалды жыршылар мектебі қалыптасса деген орынды тілек жеткізілді.
Осындай іс-шараның ұйымдастырушы Облыстық халық шығармашылығы мен кинобейнеқор орталығы. Орталық басшысы Дәмер Қалқаев облыстық мәдениет басқармасы басшысы Ерлан Қалмақовтың Алғыс хатын табыстап, кеш иелерінің иығына шапан жапты.
Қостанай облыстық «Композиторлар одағы» қоғамдық бірлестігінің төрағасы Азамат Мұқатов одақ мүшелігі куәлігін табыстап, «Жыр құлагері» төсбелгісін тақты.
