Бүгін қазақтың көрнекті ақыны, ҚР Абай атындағы Мемлекеттік сыйлығының лауреаты, Қазақстанның Халық жазушысы С. Мәуленовтің туғанына 100 жыл.
Ақын Қостанай облысының Жангелдин ауданында 1922 жылы дүниеге келді. Абай атындағы Алматы мемлекеттік университетін бітірген. Екінші Жаһандық соғысқа қатысқан. Республикалық газет-журналдарда, баспа орындарында еңбек етті. «Қазақ әдебиеті» газетінің, «Жұлдыз» журналының бас редакторы болды.
С. Мәуленов – қырыққа жуық жыр жинақтарының авторы. Өлеңдері қазақ поэзиясының лирика жанрын дамытуға елеулі үлес ретінде қосылды.
Өлең өлкесіне келген әр ақын Сырбайша оқуға, Сырбайша жазуға, Сырбайша сөйлеуге ұмтылады. Сырбай Мәуленов тек өз мектебі бар ақын ғана емес, қазақ поэзиясын жарқыраған жаңа кезеңге көтеріп бере алған кемел құбылыс. Сырбай − қазақтың ұлттық әдебиетінің классигі.
Ақынның мерейтойы аясында туған өлкесінде, есімі берілген мектебінде түрлі мәдени шаралар өтуде.
