АХМЕТ БАЙТҰРСЫНҰЛЫНЫҢ ВИДЕОСЫ ТАБЫЛДЫ

Ахмет Байтұрсынұлының видеосы табылды. Бұл туралы қаламгер, экспедиция мүшесі Абылай Маудан Facebook-тегі парақшасында сүйіншілеп жазды.

Ұлт ұстазының жиында отырған сәті бейнеленген тарихи таспа «Ахмет жүрген ізбенен» экспедициясы мүшелерінің қолына тиді.

Ахмет Байтұрсынұлының 150 жылдығына орай рухани сапарға шыққан экспедиция Бакуге де барған еді. Осы жолда қостанайлық саяхатшылар үлкен олжаға кенелді.

«Сүйінші сұрар жаңалығым бар! Биылғы Әзербайжан астанасына барған сапарымызда 1926 жылы Бүкілодақтық түркологтар құрылтайының бейнежазбасын алуға келіскен едік. Тарихи таспа тамыз айының аяғына таман қолыма тиді. Мұның ішінде алыстан түсірілген 1.28 секунд видеоны Ахаңа ұқсатып отырмыз. Ахметтануға зор еңбек сіңіріп жүрген Орынай Жұбай, Елдос Тоқтарбай сынды ғалымдар «отырған орны, киген киімі, келбеті бәрі-бәрі Ахаңа келеді» деп сеніммен айтып отыр», - дейді экспедиция мүшесі Абылай Мауданов.

Күмән болмас үшін тиісті орындарға құрылтайда түскен фотосымен қоса жіберіп, сурет пен бейнедегі кісінің ұқсастығын анықтап беру сұралған. Олар толық зерттеу үшін көп уақыт керек екенін айтқан. Десе де қатты ұқсайтынын мойындаған.

Әзірбайжан елінің «AZ TV» арнасына жарияланған шағын видеода Бакудегі құрылтайға Қазақстаннан 4 делегат – Ахмет Байұрсынұлы, Елдес Омарұлы, Біләл Сүлеев және Нәзір Төреқұловтар қатысқаны айтылады.