Рудный қаласында талантты әнші Мұқан Ноғаевтың «Әнім менің жан серігім» атты шығармашылық кеші өтті.
Бұл «Аманат» партиясының ұйымдастыруымен «Ерулік» атауымен облыстық форум негізінде дарынды қандастарымызды қолдау мақсатында ұйымдастырылған алғашқы шығармашылық кеш. Игі бастама әлі де жалғасын тауып, аймаққа танымал талантты қандастарымыздың кештері кезең-кезегімен өтетін болады.
Мұқан Ноғаев республикалық, облыстық байқаулардың жүлдегері. Рудный қаласының мәдени кештері Мұқансыз өтпейді. «Сегіз қырлы, бір сырлы азамат» сахнаның сәні. Сөзге шешен, әнші, спортшы жігіт қандай мадаққа да лайық.
Концерт облыстық халық шығармашылығы мен кинобейнеқор орталығының, Рудный қалалық мәдениет бөлімінің қолдауымен өтті. Орталық басшысы Дәмер Қалқаев облыстық мәдениет басқармасының басшысы Ерлан Қалмақовтың Алғыс хатын табыстап, иығына шапан жапса, Рудный қалалық мәдениет бөлімінің басшысы Жанат Қазбекқызы да лайықты сый құрметін көрсетті.
