«КҮМБІРЛЕ, ҚОҢЫР ДОМБЫРА!»

Қостанайлықтар Ұлттық домбыра күнін барынша сән салтанатымен атап өтті.

«Күмбірле, қоңыр домбыра!» атты концерттік бағдарлама қаламыздың әр жерінде кезең кезеңімен өтіп жатты.

Жастар саябағынан бастау алған мәдени шара «Қостанай плаза» сауда ойын-сауық орталығының алаңында, «Керуен саябағы» мен А.Байтұрсынұлы алаңында жалғасын тапты. Барлық жерде ән мен күйден шашу шашылды. Жиналған халық бірге билеп, бірге әндетті.

Мереке кешкі сағат 18 00-де Сити орталықта Тобыл-Торғай өнерпаздарының мерекелік концертімен қорытындыланды. Бұл жерде Ы.Алтынсарин мұражайының көрмесі де орналастырылады. Саха төрінде «Жұлдыз» домбыра студиясының оқушылары «Құлагер» күйін шалқытты. Осынау шараны ұйымдастырған облыстық мәдениет басқармасының басшысы Е.Қалмақов бұл күннің маңыздылығына тоқтала келе, баршаны бүгінгі мерекемен құттықтады.

Марғұлан Оспанов ұлы Дінасыл Бақытбекпен «Арнау» орындаса, Е.Өмірзақов атындағы облыстық филармониясының домбырашылары күй тартыс тарту етті. Серік Алпысов «Дала» термесін, Қыдырбек Қиысқан «Елім менің» әнін нақышына келтіріп орындап берді. Мұрат Нағашыбай «Туған жерім, туған ауылым» әнін, І.Омаров атындағы облыстық қазақ драма театрының жастары А.Байтұрсынұлының өлеңдерінен үзінділер және «Екі жирен» әнін орындады. Әнші Арыстан Құрманов және Рудный қаласы, Федоров, Алтынсарин, Қостанай ауданының өнерпаздары әннен шашу шашып, бүгінгі күннің сәнін келтірді.

Осымен Ұлттық домбыра күніне арналған «Күмбірле, қоңыр домбыра» атты мерекелік іс-шара өз мәресіне жетті. Осы күннің мән мағынасын келтіріп, халыққа көңіл күй сыйлаған баршаға алғысымыз шексіз. Домбыра дәуірі жасай берсін.