28 маусым - Бұқаралық ақпарат құралдары қызметкерлерінің төл мерекесі. Яғни бүгін халықтың әл-ауқаты мен қоғам тынысынан хабар тарататын тілшілер қауымы кәсіби мерекесін атап өтуде. Облыстық көркемөнерпаздардың халық шығармашылығы мен кинобейнеқор орталығы да журналистер қауымын төл мерекелерімен құттықтайды. Жақсылықтың жаршысы бола білген тілшілер қауымына шабыт пен шығармашылық табыс тілейміз.
Осы мерекеге орай орталық басшысы Дәмер Қалқаев облыстық «Қостанай таңы» газетінің қос фототілшісі Бағдат Ахметбеков пен Бердіболат Көркембаевті, «Костанайские новости» газетінің фототілшісі Сергей Мироновты және «Қазақстан» республикалық телерадиокорпорациясының облыстық филиалының операторы Руслан Жабаевті өңіріміздің мәдениетін қалыптастырғаны және БАҚ-та облысымыздың шынайы келбетін жасап, өмір айнасына айналдырғаны үшін Алғыс хатпен марапаттады.
Баршаны кадрға алып, өздері обьективтен тыс қалатын фототілшілер мен операторлардың еңбегі ерек. Мерекеде оларға «мәдени шараны түсіру барысында қандай әсер аласыз?» деген ортақ сауал қойдық.
Бағдат Ахметбеков: «Рухани күш аламын. Сол кездегі атмосфераны халыққа жеткізсем деймін. Өнер иесінің ең бір ұтымды сәтін түсіріп, естелік ете білсем деген ой болады».
Бердіболат Көркембаев: «Мәдени шараларды түсіру барысында бар қызықтан өзің құр қаласың. Бар ойың әдемі сәттерді нысанаға алу. Рахаттанып, шараны тамашалай алмайтының өкінішті. Бірақ фототілшінің жұмысы өзгелерге қуаныш сыйлайтыны қуантады».
Сергей Миронов: «Бастысы өткен шарадан шынайы сәттерді ұсыну, мәдени шаралардан шабыт алып, көңілім көтеріліп қалады».
Руслан Жабаев: «Сол сәттен өзің ғана ләззат алмай, оны мыңдаған көрерменмен бөлісе білгенге не жетсін».
Мереке құтты болсын, журналистер қауымы!
