І.Омаров атындағы облыстық қазақ драма театрында Қазақстанның еңбек сіңірген қайраткері, «Парасат» орденінің иегері, дәстүрлі әнші, жыршы-термеші Хатимолла Бердіғалиевтің «Шырқал ән, төгіл дауыс» атты өнер кеші өтті. Аталмыш іс-шара Батыс Қазақстан облысы әкімдігі және облыстық мәдениет басқармасы қолдауымен өнер иесінің 70 жас мерейтойына орай ұйымдастырылды.
Хатимолла Жәңгірұлының репертуарында қазақтың үш жүзден астам халық әндері, Бұқар, Базар, Қашаған жыраулардың терме-жырлары, Мұхит Мералиевтің, Ғарифолла Құрманғалиевтің және халық композиторларының әндері де бар. Қазақ радиосының алтын қорына Хатимолла Бердіғалиевтің өнері туралы хабар және «Ел» продюссерлік орталығында жазылған 83 әні енгізіліп, қазіргі таңда ұлтымыздың үн жариясының әуе толқынында әуелеп келеді. Әншінің құрметіне ұйымдастырылған өнер сапары Қазақстанның 10 облысы мен 2 қаласында өткізілмек.
Өнер иесінің Қостанай жеріне келуі алғаш емес. Ол бұған дейін де Тобыл-Торғай жерінде болған. «Нұржан Наушабайұлы, алаш қайраткерлері дүниеге келген, әйгілі композитор Әбілахат Еспаев, айтыс сахнасында талай жыл бірге жүрген әріптесім Әсия Беркенова сынды майталмандардың туған жері. Осындағы мәдениет саласында жүрген азаматтар кешімізге жақсы дайындалғанына ризамын» деп алғысын білдірді Хатимолла Бердіғалиев.
Кеш иесін облыстық мәдениет басқармасының басшысы Ерлан Қалмақов құттықтап, иығына шапан жауып, жылы лебізін білдіріп, құрмет көрсетті. 
