ЖЕҢІМПАЗДАР МЕН ЖҮЛДЕГЕРЛЕР МАРАПАТТАЛДЫ

Бүгін Қостанай қаласындағы Жастар сарайында Тәуелсіздіктің 30 жылдығын қорытындылаған ХХХIV «Өнеріміз саған, Қазақстан!» облыстық көркемөнерпаздардың халық шығармашылығы байқау-фестивалінің жеңімпаздары мен жүлдегерлері марапатталды.

Іс-шараға Қостанай облысы әкімінің орынбасары Бақыт Есімова қатысып, жүлде иелеріне марапат табыстау рәсімін жүргізді.

Сонымен, байқаудың ІІІ орынын Қостанай ауданы иеленді. Ұжымға 1 миллион теңгенің сертификаты табысталды. ІІ орынды Амангелді және Әулиекөл аудандары бөлісіп, әрқайсысына 1,5 миллион теңгенің сертификатын қанжығаға басты. І орын – Арқалық қаласының еншісінде. Қоржындарында – 2 миллион теңге. Ал биылғы облыстық көркемөнерпаздардың халық шығармашылығы байқау-фестивалінің бас жүлдесін Федоров ауданы жеңіп алды. Жаркөл өңірінің өнерпаздарына 3 миллион теңгенің сертификаты табыс етілді.

Қалған аудан-қалалардың мәдени ордалары мен жекелеген өнерпаздары ақшалай сыйлықтармен марапатталды.

Айта кетейік, осы жиында мәдениет және өнер саласындағы атқарылған жұмыстар, алға қойылған жоспарлар, сондай-ақ түйткілді мәселелер сөз болды.

Облыстық Мәдениет басқармасының басшысы Ерлан Қалмақов аталған жайттарға кеңінен тоқталды.
Басқарма басшысы баяндағандай, Алтынсарин, Әулиекөл, Қамысты, Қостанай, Меңдіқара, Ұзынкөл аудандарының халық саны мыңнан асатын 13 елді мекені мәдени-демалыс орындарына мұқтаж. Биыл Қарабалық ауданының Тоғызақ, Амангелді ауданының Қарасу, Меңдіқара ауданының Михайлов мәдениет үйлері күрделі жөндеу және 75 нысан ағымдағы жөндеу жұмыстарынан өтеді. Биыл Ұзынкөл ауданының Ершов елді мекенінде мәдениет үйінің құрылысы басталады. Сарыкөл аудандық мәдениет үйі ғимаратының шатыры мен Науырзым ауданындағы «Арман» мәдени-демалыс орталығының ғимараты жаңартылады. Денисов ауылындағы орталық кітапхананы күрделі жөндеуден өткізу де жоспарланып отыр. Сондай-ақ, ұлт ұстазы Ахаңның мерейтойы қарсаңында Торғайдағы Ахмет Байтұрсынұлы мен Міржақып Дулатұлының әдеби мұражайы жөнделеді.

Мәжілісте кадр мәселесі де қозғалды. 2020-2021 жылдары облысқа 77 қызметкер келген. Олардың 54-і «Дипломмен – ауылға!» бағдарламасы арқылы жұмысқа орналасқан.