Бүгін Алаштың аяулы ақыны, Айтыс ақтаңгері, мақтаныш тұтар жерлесіміз Айбек Қалиевтің туған күні. Қуаныш иесін жаңа жасымен ұжым атынан шын жүректен құттықтаймыз!
Құрметті Айбек Киікбайұлы, сіз айрықша ақындық дарыныңызбен, бөлек болмысыңызбен ерекшеленіп, есіміңіз еңбектеген баладан еңкейген қарияға дейін танымал болған жансыз.
Ұлттың ұлық өнері айтыстың бел ортасында жүріп, баба мұрасын насихаттап қана қоймай, оны жаңа бір деңгейге сатылауына ықпал еткен тұлғалардың бірі де бірегейі болдыңыз.
Сізді Тобыл-Торғай өңірінің ақындық мектебінің кешегісі мен болашағын жалғап тұрған алтын көпір деп білеміз. Тәуелсіздік жылдарында ес білген жастар өзіңізден өнеге алып өсті. Тұтас бір буын ізіңізді басып, үлгі тұтып есейді.
Әлі күнге жас буынның ұлағатты ұстазы, ақылшы ағасы, қамқор тілекшісі болып отырсыз. Дәйім, еңбегіңіз еленіп, абыройыңыз асқақтап, беделіңіз биіктей түссін!
Шабытыңыз шалқардай шалқып, алқалаған ағайын-жұрттың алақанынан түспей, алғысына бөленіп, құрметіне кенеле беріңіз!
Алла сізге ұзақ ғұмыр, мықты денсаулық, сарқылмас бақыт, таусылмас береке, еңбегіңізге жеміс, отбасыңызға аман-саулық нәсіп етсін! Өзіңіз жүз, ұрпағыңызбен мың жасаңыз!
