Роза Бағланованың 100 жылдығы ЮНЕСКО деңгейінде аталып өтеді
2022 жылы 1 қаңтар күні қазақтың бұлбұлы КСРО мен Қазақстанның халық әртісі, Халық қаһарманы, кеңестің және қазақтың опера және эстрада әншісі Роза Бағланованың туғанына 100 жыл толды.
Роза Тәжібайқызы 1922 жылы 1 қаңтарда Қызылорда облысының Қазалы өңірінде туған.
1941 жылы Қызылорда педагогикалық институтын тамамдады. Өнер жолын Ташкент филармониясының ән-би ансамблінде әнші болып бастады. Ол сол ансамбль қатарында Ұлы Отан соғысы жылдары майдан даласында өнер көрсетіп, 1945 жылы 9 мамырда Берлиндегі жеңіс концертіне қатысты.
1947-1949 жылдары Қазақ опера және балет театрының, 1949-1960 жылдары Қазақ филармониясының, 1960 жылдан бері Қазақконцерттің әншісі болып, ұлттық ән өнерін дамытуға зор үлес қосқан дарын иесі.
Роза Бағланова қазақтың халық әндерін, шет ел халықтарының (орыс,венгр, өзбек, қырғыз, тәжік, украин, әзербайжан, грузин, корей, қытай, моңғол, үнді, чех, швед, т.б.) әндерін нақышына келтіре орындады.
Ленин, Еңбек Қызыл Ту, «Халықтар достығы» ордендерімен, «Шапағат» медалімен марапатталған.
Күміс көмей әнші 2011 жылы 8 ақпанда 90 жасқа қараған шағында дүниеден өтті.
