ТӘУЕЛСІЗДІК — ТӘУ ЕТЕР КИЕ!

Қазақстан Республикасының Тәуелсіздігі күні - еліміздің ең ұлық мерекесі.

Тәуелсіздік - тәу етер жалғыз киеміз, Тәңір сыйы.

Ата-бабамыз сан ғасыр армандап өткен азаттық - ұлтымыздың ұлы құндылығы. 16 желтоқсан - әлем картасында жас мемлекеттің пайда болған күні.

Тәуелсіз мемлекеттің жаңа тарихы басталған күн. Алаш жұрты абыройы аспандап, құты тасыған сәт те осы мезет.

Артқа үш онжылдықты қалдырған мемлекеттің мақтанышпен айтар жемісі мен жеңісі, табысы толайым. Қазақстан осы уақыт бедерінде үздік елдермен үзеңгі қағыстырып, терезесін теңестірді.

Ғаламдық ұйымдардың төрағасы деңгейіне көтеріліп, дүниежүзілік сенімге ие болып, төрткүл әлемге төрелік тыңдатты.

Құндылығын түгендеп, шекарасын шегендеп, шартарапқа шашыраған қандастарды атажұртқа оралттық.

Ұлт пен ұлысты бір шаңырақ астына ұйытып, бірлігін бекемдеп, ынтымағын нығайта түсті. Біз бейбіт те берекелі елде өмір сүріп жатқан бақытты ұрпақпыз.

Сондықтан да еркіндіктің қадірін білу, мемлекетіміздің дамуына үлес қосу - басты мұратымыз болуы тиіс. "Тәуелсіздікті алу оңай емес, оны ұстап тұру одан да қиын" деген тәмсілге сүйенсек, егемендіктің қадір-қасиетін ұғыну, білімге, рухқа, намысқа жүгіну - маңдайалды мақсатымыз!

Азаттық парқын мереке кезінде ғана емес, күн сайын, сәт сайын ұғынуымыз шарт!

Құрметті жерлестер, баршаңызды ұлы мерекемен шын жүректен құттықтаймыз!

Еліміздің келешегі кемел, болашағы жарқын, абыройы асқақ, беделі биік болсын! Ырысы мен ынтымағы жарасқан ел ретінде дүн-дүниеге танылып, даму даңғылымен ілгерілей берейік!

Ел іргесі аман, тыныш заман болсын! Тәуелсіздігіміз баянды болсын, отандастар!