1 желтоқсан – Қазақстанның тәуелсіздік тарихындағы айтулы күндердің бірі. Себебі осыдан тура 30 жыл бұрын бүкілхалықтық сайлау нәтижесінде Нұрсұлтан Әбішұлы Назарбаев дербес мемлекеттің Тұңғыш Президенті болып сайланды. Сол сәттен бастап ел тағдыры Елбасының қолына сеніп тапсырылды.
Егемен елдің еңсе түзеп, аяқтан нық тұруына, халықтың әл-ауқатының артып, экономикасының тұғырлануына ұлт көшбасшысының сіңірген еңбегі ұшан-теңіз. Өшкеніміз жанып, жоғалғанымыз түгенделіп, шекарамыз шегенделіп, Ата заң мен рәміздеріміз бекітіліп, әлем алдында абыройымыз асқақтаса, оған да Тұңғыш Президенттің сарабдал саясатының септігі зор. Ал, осындай елдіктің бастауында тұрған тұлғаларды ардақтау, олардың билікке келген күнін ұлттық мереке ретінде атап өту – кез келген өркениетті елдердегі дәстүр десек болады. Осымен оныншы рет атап өтілгелі отырған мерекемен барша қазақстандықты құттықтағымыз келеді.
Ел аман, жұрт тыныш, ұлтым дейтін ұлдар, елім дейтін ерлер есен-сау болсын!
