Ерлан Нұрманғалиев— ақын, композитор, әнші, домбырашы 1971 жылдың 2 қарашасында Қостанай облысы Аманкелді ауданы Қабырға ауылында дүниеге келген. Әкесі мен анасы он бала тәрбиелеп өсірген ата-ана. Екі жасында Ерланды атасы мен әжесі бауырына басады. Ол мектепте оқып жүрген кезінен өлең шығара бастайды. Арқалық қаласындағы гуманитарлық училищенің аспаптық мамандығын тәмәмдаған соң, ұстаздық қызмет жасайды.Осы жылдары ақын, сазгерлікке бой бұрады. Ерланның шығарған әндері халықтың жүрегінен жол тауып, жастардың сүйікті әндеріне айналып, кең таныла бастайды.
Ерлан Нұрманғалиев 1995 жылы отбасын құрады.Жұбайы Айнұр екеуі Думан, Ғибрат атты екі атқамінер ұлдарды дүниеге әкеледі.
Аз ғана ғұмырында әсем әуен мен сырлы сезімге толы сазды лирикалық әндер жазып, өшпес із қалдырды.
Жүрек тербетер жиырмадан астам әсем әндері облыстық қана емес, республикалық сахналарда да «Жұмбақ махаббат», «Асыл жарым», «Есіме аламын», «Жүрегімнің алауы», «Іңкәр сезім» атты көптеген әндерін Мәдина Садуақасова, Мирас пен Құралай, Нұрболат Арзамасұлы, Төреғали Төреәлі, Шахаризат Сейдахметтей эстрада жұлдыздары орындап жүр.
