Маусым тың туындымен ашылды 1 қазан күні Ілияс Омаров атындағы Қостанай облыстық қазақ драма театры ХХІІ маусымының шымылдығын түрді

Маусымашардың қазан айының алғашқы күні басталуы кездейсоқтық емес, бұл күні көрнекті қоғам және мемлекет қайраткері дүниеге келген.

Жаңа маусым өзбек драматургі Ш.Башбековтің «Темір қатын» комедиясымен ашылды. Қоюшы режиссері – театрдың көркемдік жетекшісі Баатырбек Шамбетов.

Отбасы болғасын ыдыс-аяқ сылдырламай тұра ма, механизатор Қошкар ака жұбайы Кумримен жүз шайысып қалады. Әйелі бала-шағасын ертіп, төркініне тайып тұрады. Ерегескен тракторшы жас ғалым ойлап тапқан робот-әйелге үйленіп, некесін қидырады.

Жалпы, комедия көтерген мәселе өте ауқымды. «Темір-қатынның» қолынан бәрі келеді, бірақ ол жан жылуын бере ала ма? Қандай мықты роботтың өзі бір әйел атқарар үйдің жұмысына неге шыдамады? Адамзат ақылының шыңы, жетілген ең жоғарғы технология можантопай механизатордың қолына түссе, нәтижесі не болмақ? Бүгінде тұрмысқа дендеп енген жасанды интеллект жүрегіңе үстемдік жүргізіп, жан дүниеңді билеп, өміріңе қатер төндірсе ше? Тұжырым жасау қабілетіне ие болған «Темір-қатын» арбағанда, өзін «тас жүрек» сезінетін еркек неге еңкілдеп жылады? Ең өзекті сұрақтарға жауапты «Темір-қатынды» тамашалаған адамның өзі-ақ табады. Премьераға келген көрермендер комедиялық қойылымнан ерекше әсер алғандай.

Қойылым соңында облыстық Мәдениет басқармасының басшысы Ерлан Қалмақов өнер ордасының ұжымын жаңа маусымның ашылуымен құттықтап, тың туындыны сахнаға сәтті алып шыққан режиссер мен әртістерге лебізін жеткізді. Сондай-ақ, Қарағанды қаласына театрлар байқауына аттанғалы отырған ұжымға сәттілік тіледі.