Танымал әнші, талғампаз сазгер

«Тобыл-Торғай әуендері» айдарының кезекті қонағы – әнші, сазгер, Е.Өмірзақов атындағы филармониясының әншісі Сапар Әлімжанұлы Молдабеков. Өнер иесімен жүргізген қысқа-нұсқа сұқбатымызды назарларыңызға ұсынамыз.

- Әуелі өзіңізді кеңірек таныстыра өтсеңіз?

- Мен, Молдабеков Сапар Әлімжанұлы 1973 жылы 8 шілде күні бұрынғы Торғай облысы, Октябрь ауданы, Вильямс елді мекенінде тудым. Сол ауылда орта мектепті бітірдім. 1988-1992 жылдар аралығында Қостанай Автожол техникумында кәсіптік білім алып, содан кейін 1993-1998 жылдары А.Байтұрсынов атындағы Қостанай мемлекеттік университетінің музыка факультетінде оқыдым.

- Өнерге қай жасыңыздан бастап келдіңіз?

- Бес жасымнан аккордеонда ойнай бастадым.Отбасылық ансамбльмен түрлі байқауларға қатысып, көптеген сайыстарда жеңімпаз атандым. Содан бері өнер сахнасында жүрмін.

- Қашаннан бастап ән жаза бастадыңыз? Тырнақалды туындыларыңыз туралы айта кетсеңіз?

- Ең алғашқы әнімді 20 жасымда Қостанай автожол техныкумында оқып жүргенімде жаздым. «Не звони» деп аталатын ән. Бірінші туындым сәтті шығып, тыңдармандарға ұнағандықтан, композиторлық қабілетімді ұштай түстім. Әлі күнге дейін әндер жазып келемін.

- Қазіргі жаңа шығып жатқан әндерге, яғни заманауи әуендерге көңіліңіз тола ма?

- Қазіргі әндер шетелдік шығармаларға, батыстық стильге көп ұқсап бара жатыр. Жеңіл-желпі, алыпұшпа, дарынсыз әндер көбейіп кетті. Сол себепті соңғы үлгідегі әндерге көңілім тола қоймайды.

- Алдағы уақыттарға еншілеп отырған қандай шығармашылық жоспарларыңыз бар?

- Ойда жүрген жоспар көп. Соның ішінде ҚР Тәуелсіздігінің 30 жылдығына орай әуен жазсам ба деп отырмын. Бұл ел егемендігіне жасаған ең керемет тартуым болар еді.