Құрметті ұстаздар қауымы, оқушылар және ата-аналар!
Сіздерді бүгінгі Білім күнімен шын жүректен құттықтаймыз! Бұл күні қаншама балдырған мектеп табалдырығын тұңғыш аттап, қаншама оқушы алтын ұядан түлеп ұшар сәтке бір табан жақындай түседі.
Білім – адам өміріндегі сарқылмас қазына. Кез келген мемлекеттің болашағын баянды, тәуелсіздігін тұғырлы ететін, озық елдермен терезесін теңестіретін басты құндылық та – осы. Елбасы Н.Назарбаевтың да: "Ел болашағы білімді жастардың қолында", - деуінің мәні терең. Сол себепті өскелең ұрпақ талмай талпынып, тәлім-тәрбиені бойына сіңіріп, оқуда озат атануға ұмтылуы тиіс.
Елдегі эпидемиологиялық ахуалға байланысты қоңырау сыңғырын есту мұңға айналса да, оқу онлайн форматында жалғасып, сапалы білім беру үрдісі іркілген жоқ. Осы орайда аты жаман кесел келмеске кетіп, оқу ошақтарының есігі айқара ашылып, еліміздің қамсыз тіршілігіне қайта оралуын, Қазақстанның ертеңгі иелерінің өнер-біліммен қанаттануын тілейміз!
Жаңа оқу жылы баршаңызға құтты болсын!
