Осы жылдар ішінде Қостанай облысы қалыптасу мен өркендеудің өнегелі жолынан өтіп, бүгінде Қазақстанның іргелі аграрлық, индустриялық әрі мәдени ошағына айналды. Табиғи байлығы бай, өндірісі кең, ауыл шаруашылығы ауқымды, ғылымы мен білімі асқақ, денсаулық сақтау саласы мықты, спорты мен мәдениеті қатар дамыған Қостанай облысы өзінің толайым табыстарымен таңқалдырып келеді. Ал осы жетістіктердің бастауында туған жердің өсіп-өркендеуіне адал еңбек еткен, дамуына үлес қосып жүрген азаматтардың есімдері тұр.
Өңір шежіресінің қалыптасуында мәдениет саласы қызметкерлерінің орны айрықша. Олар ұлттық руханияттың шамшырағын сөндірмей, халықтың төл өнері мен мәдени мұрасын ұрпақтан ұрпаққа жалғап келеді. Олардың қажырлы еңбегінің арқасында ұлттық салт-дәстүріміз дамып, халық шығармашылығы қанат жайып, өнер әлемінде жаңа есімдер танылуда.
Өнер ұжымдары, әншілер мен күйшілер, бишілер, қолөнер шеберлері, үйірме жетекшілері, оқытушылар мен мәдениет қайраткерлері Қостанай облысының абыройын республикалық және халықаралық сахналарда лайықты танытып, туған өлкенің мерейін үстем етіп жүр. Олар ел рухын асқақтатып, мәдени құндылықтарды дәріптеп, сүбелі үлестерін қосып келеді.
Осы мерейлі күні Қостанай облысының барлық мәдениет қызметкерлерін өңіріміздің 90 жылдық мерейтойымен шын жүректен құттықтаймыз!
Сіздерге ұлттық мәдениетті сақтап, рухани құндылықтарды ұлықтау жолындағы өлшеусіз еңбектеріңіз үшін шынайы ризашылығымызды білдіреміз. Халыққа шабыт сыйлап, елдің рухани өмірін байытып жүрген еселі еңбектеріңіз әрдайым жоғары бағалана берсін. Дендеріңізге саулық, отбасыларыңызға амандық, шығармашылық шабыт, тың жобалар, толайым табыс, көрерменнің ыстық ықыласына бөлене беріңіздер. Қостанай облысының өсіп-өркендеуі жолындағы еңбектеріңіз жана берсін!
Мерейтойлық іс-шаралар легі Қостанай облысының 90 жылдығына арналған «Өнеріміз саған, Қазақстан!» атты XXXVII облыстық халық шығармашылығы фестиваль-байқауының салтанатты гала-концертімен жалғасады.
2026 жылғы 1 тамызда сағат 18:00-де Қостанай қаласының Орталық алаңында облыстың барлық қала-аудандарынан келген үздік шығармашылық ұжымдар, әншілер, күйшілер, бишілер мен өнерпаздар бас қосады. Олар өз өнерлері арқылы туған жерге деген шексіз сүйіспеншілігін білдіріп, Қостанай өңірінің бай тарихын, мәдени мұрасын паш етіп, жырдан шашу шашады.
Ән мен күйге, би мен ұлттық өнерге, сырлы саз бен көтеріңкі көңіл күйге толы мерекелік кешке Қостанай облысының тұрғындары мен қонақтарын шын жүректен шақырамыз.
Қасиетті туған жердің 90 жылдық мерейтойын бірге атап өтіп, өңірдің өнері мен мәдениетінің мерейін бірге асқақтатайық!
