Қостанай облысында жыл сайын ұйымдастырылатын «Өнеріміз саған, Қазақстан!» атты ХХХVІІІ облыстық көркемөнерпаздар халық шығармашылығы байқау-фестивалі өңірдің мәдени тынысын айқындайтын маңызды оқиғалардың біріне айналған
Бүгінде фестиваль облыстың аудан-қалаларын аралап, өнерсүйер қауымды бір арнаға тоғыстырып, қанатын кеңге жайды.
Байқау шымылдығын алғаш болып Федоров ауданы түріп, фестивальге ерекше серпін берді.
Бұл өңірдің өнерпаздары бірден жоғары дайындықпен келіп, көрерменге мазмұнды да әсерлі бағдарлама ұсынды. Фестивальдің басты ерекшелігі жанрлық әралуандық болса, осы жағынан өнерпаздар өздерін көрсете алды.
Сахна төрінде вокалдық ансамбльдер, халық аспаптар оркестрлері, би ұжымдары мен драма театрлары өнер көрсетіп, әрқайсысы өз бағыты бойынша тың дүниелерді паш етті. Әсіресе, ұлттық мұраға негізделген қойылымдар мен фольклорлық шығармалар көрерменнің ерекше ықыласына бөленіп, дәстүр мен заманауи өнердің үйлесімін айқын көрсетті.
Жалпы, биылғы бағдарламалар тыңғылықты әзірленгені бірден байқалады. Жаңа қойылымдар, жаңаша шешімдер, мазмұны терең нөмірлер көрермен көңілінен шығып, залды ерекше атмосфераға бөледі. Әр қатысушы өз өнеріне жанын салып, сахнаға бар ықыласымен шыққаны анық сезілді.
Фестивальдің тағы бір айрықша тұсы – жас таланттардың жарқын көрінісі. Олардың сахнадағы еркіндігі, өнерге деген сүйіспеншілігі мен ізденісі болашаққа үлкен сенім ұялатады. Ал тәжірибелі мәдениет қызметкерлері мен өнерпаздардың қатысуы шараның деңгейін арттырып, кәсіби шеберлік пен халықтық өнердің сабақтастығын көрсетуде.
Мәдени іс-шараның тағы бір маңызды қыры – өңірлер арасындағы шығармашылық байланысты нығайту. Аудан мен қалалар өзара тәжірибе алмасып, жаңа идеялармен бөлісуде. Бұл үрдіс өңірлік мәдениеттің дамуына оң ықпал етіп, өнердің жаңа белестерге көтерілуіне жол ашады.
Әр аудан мен қала бұл байқауға тың идеялармен, ерекше сахналық шешімдермен келген.
Ұлттық нақыштағы киімдер, дәстүрлі әуендер мен заманауи бағыттың үйлесімі фестивальдің көркін қыздыра түсті. Бұл жерде аудан, қалалардың әкімдерінің жанашырлығы сезіледі. Олар өздері концертке келіп қатысып, қолдау білдіріп жатса қандай ғаибет. Мысалы, Федоров, Лисаков, Жітіқара, Қамысты, Сарыкөл, Қарасу өңірлерінің әкімдері өнерпаздармен бірге болып, қолдау білдірді.
Күні ертен өнер додасын өңірдің оңтүстігі қабылайды.
