37-ші «Өнеріміз саған, Қазақстан!» облыстық көркемөнерпаздардың халық шығармашылығының байқау-фестивалі қасиетті Торғай жерінде өтті
Көне Торғайдың ән мен күй, жыр шашулары көрерменнің көңілін бір көтеріп тастады. Байқау-фестивалінің концерттік бағдарламасына арнайы аудан басшылығы қолдау білдірді. Аудан өнерпаздарының өнеріне бағасын беретін облыстық байқау-фестивалінің әділ-қазылар алқасы да үздіктерді түртіп алып отырды.
Концерт театрландырылған қойылыммен ашылды. Жақында ғана жарты ғасырлық мерейтойын атап өткен «Ғасырлар пернесі» халық ансамблі «Ақ сауытты» тарту етті. «Нағыз қазақ, қазақ емес, нағыз қазақ – домбыра» демекші, Мэлс Марселұлы Құрманғазының «Ақсақ киігін» шебер орындап, ортекені орғытты. Тыңдаушының делебесін қоздыратын күй тартыста Перизат Қалабайқызы мен Мэлс Марселұлы бір-біріне дес бермей, сайысты. Фариза Бүркітбайдың орындауында халық әні, «Желкілдек» тамаша шықты. «Еркеназ» бишілер тобы қазақ биі «Керім-айды», Бақытжан Байқадамов атындағы камералық хоры Шәмші Қалдаяқовтың «Арқалықтың ақ таңын» әуелете орындады.
Жанкелдин ауданының өнерпаздары халықтар достығын паш етіп, өзге ұлт өкілдерінің өнерін де сахна төріне шығарды. Aznavour, «UNE VIE D.AMOUR» Мирас Әбдікәрім мен Гүлдана Сарсенгелдина орындаса, Өзбек биі «Хорезмді» «Еркеназ» бишілер тобы төгілтті. Ал Александр Зацепиннің «Көктем вальсі» «Ару аналар» аналар ансамблінің орындауында жүрекке жетті.
Өнерпаздар тамаша көңіл күй сыйлап, концерттік бағдарламаны түрлендіріп, жақсы әсер қалдырды.
