Өңірде XXXVII облыстық “Өнеріміз саған, Қазақстан!” байқау-фестивалі басталып, оған қала мен аудандардың үздік өнерпаздары қатысуда. Фестивальдің бірінші аптасында Федоров, Қарабалық, Мендіқара және Ұзынкөл аудандарының талантты ұжымдары көрермендерді қуантты.
Байқауды алғашқы болып осы фестивальдің бірнеше мәрте жеңімпазы атанған Федоров ауданы ашты. Аудан өнерпаздары бұл жолы да қуанта білді.
Домбырашылар ұжымы, балалар өнер мектебі тәрбиеленушілерінің, танымал қолөнер шебері Айдын Диханбаевтың жұмыстары да көрмеде қойылған.
Қазылар алқасының құрамында облыстық филармонияның әртістері, облыстық мәдениет басқармасының, Қостанай педагогикалық колледжінің және облыстық халық шығармашылығы орталығының сарапшылары бар. Байқау қатысушыларын аудан әкімінің орынбасары Валеев Р.Г. құттықтап, игі тілегін жеткізді.
Кезекте тұрған Қарабалық ауданы өнерпаздары мерекелік қойылымдарды, ән мен күйді тарту етті. Өнерпаздар да концерттік нөмірлерді бір деммен орындап шықты.
Гүлдана Ержанова “Қазакия”, Сәкен Байсенгіров “Сағындым сені” шығармаларын орындады, Григорий Гонтар тыңдаушыларға “Магнолия елкесінде” ретро әнін арнады. Орыс халық аспаптар оркестрі көрермендерді “Ноктюрнмен”, ал “Ручеек” би ұжымы “Бедене” биімен қуантты.
Ұлттық сарындағы әндер де бойға рух беріп, кешті асқақтата түсті.
Кеш “Қазақстан елімнің аты” әнімен аяқталды.
Фестиваль көңілге қуаныш, бойға шабыт берді.
Мендіқара ауданында байқау барысында жергілікті тұрғындар үздік орындаушылар мен шығармашылық ұжымдардың өнерін тамашалады. Аудандық мәдениет үйінің көркемдік жетекшісі, түрлі шығармашылық конкурстардың лауреаты Байдос Қожасағиев “Өлмейтін артыңа сөз қалдырған” термесін орындап, аға буынның жүрегін тебірентті. Сонымен қатар, Томирис Марден жетекшілік ететін “Бадрисафа” хореографиялық ұжымы “Қонақжай құрбылар” қойылымымен көрермендерді қуантты. “Тобыл сазы” вокалдық байқауының лауреаты Азат Тобылұлы Муслим Магомаевтың әйгілі әнін шырқап, көрермендердің ықыласына бөленді. 40 жылдық тарихы бар «Гармония» вокалдық тобы да әсем әндерімен көпшілікті тәнті етті.
Ұзынкөл ауданында да «Өнеріміз саған, Қазақстан!» фестивалі жоғары деңгейде өтті. Ауданның барлық өнерпаздары сахнаға шығып, туған жерге деген махаббат пен құрметті ән-жырмен жеткізді. Фестиваль барысында арнайы шақырылған сарапшылар мен қазылар алқасы әр қойылымды мұқият бағалап, терең талдау жасады. Ұзынкөл ауданының 85 жылдығы құрметіне орай концертте Махаббат Битаева “Ұзынкөл” әнін орындап, ал “Атамекен” тобы “Туған жер” композициясымен көрермендерді қуантты.
Биылғы өнер додасының алғашқы аптасының қорытындылары көз қуантарлық. Қазылар алқасының айтуынша, былтырғы жылғы көрсеткішке қарағанда биылғы жыл сәтті басталып жатыр деседі. Бір апта бойы көрермен көзайымына айналған аудандарды сәтті шыққан көрсеткіштерімен шын жүректен құттықтаймыз. Облысымыздың басқа өңірлеріне алдағы байқауға сәттілік тілейміз.
