Арқалық қаласы

ХХХVI «Өнеріміз саған, Қазақстан!» атты облыстық көркемөнерпаздардың халық шығармашылығы байқау-фестивалінің қазылар алқасы Арқалық қаласының өнерпаздары әзірлеген концертті тамашалап, бағаларын берді.

Концерт жоғары деңгейде өтті. Өнерпаздар облыстық қана емес, республикалық, тіптен халықаралық сахналарда өнер көрсетіп жүрген жандар. Қазылар алқасы үздіктерді саралады. Олардың қатарында республикалық байқаулардың лауреаты, дәстүрлі әнші Айдана Асанбаева бар. Ол М.Ержановтың «Көк көгершін» әнін орындады. Сонымен қатар республикалық, облыстық байқаулардың жүлдегері Саланат Хамзина да көп ішінен дараланып, Ә.Бейсеуовтің әні «Маралдымды» әуелетті. Үздіктердің қатарынан көрініп, республикалық байқаулардың лауреаты, көркем сөз шебері Индира Идрейисованың «Мен қазақпын» поэтикалық қойылымын қоңыр даусымен шебер оқығаны көрерменнің көңілін елжіретті. Арқалықтың күміс көмей әншісі, талант иесі, көптеген байқаулардың жеңімпазы, Тобыл-Торғайдың намысын қорғап жүрген кішкентай Нұржайна Таубалдыны да атап өткіміз келеді. Ол П.Ермишевтің «Цвети моя земля» әнін шырқады. Облыстық байқаулардың лауреаты, «Ерке наз» қобызшылар ансамбілі де «Пираты карибского моря» фильмінен саундтрек ойнап, таңқалдыра білді. Жетекшісі – Гүлдана Бекхожина.

Жалпы алғанда жылдық қорытынды концерт жоғары бағаланып, қазылар алқасы өз бағаларын берді. Ұйымдастыру жағы, сахнада өздерін ұстауы, репертуар, техникалық қолдау да үйлесім тапты.