ХХХVI «Өнеріміз саған, Қазақстан!» атты облыстық көркемөнерпаздардың халық шығармашылығы байқау-фестивалі Аманкелді ауданында өтіп, қазылар алқасы жергілікті өнерпаздардың өнерін тамашалап, бағаларын берді.
Аманкелді ауданынан шыққан өнерлі азаматтар аз емес. Биыл танымал тұлғалардың мерейтойы Амангелді Имановтан басталып Әнуар Боранбаев, Айтбай Мұздаханов, Қалибек Дерібсалдин сынды азаматтардың есімдерімен жалғасын табады. Алдын ала әзірленген көрмеде көп дүниені көруге болады. Әр жәдігер аудан тарихын паш етіп тұрғандай.
Концертте халық ұлт-аспаптар ансамблі А.Мұздахановтың «Амангелді дүбірі» шығармасын ойнап, елдің рухын оятты. Еркебұлан Қасымов Ақан серінің «Жылқылы байын» орындады, К.Ахметов «Толыбай толғауы» атты өзінің шығармасын тарту етті. Бейсен Гүлназ халық әні «Желкілдекті» әуелетті.
– Ауданның өнерпаздары жоғары деңгейде концерт қоя білді. Осы өңірден шыққан танымал азаматтардың есімдері аталып, шығармалары орындалып, тақырып толығымен ашылды. Тағы бір ерекшелігі авторлық шығармалар көп болды. Сахналық киім үлгілері де жарқырап тұр. Аспаптық жанр жақсы қамтылған. Қазылар алқасы жоғары бағалады. Жиналған көрермен де ризашылығын білдірді, – дейді облыстық халық шығармашылы мен кинобейнеқор орталығының басшысы Дәмер Қалқаев.
