ХХХVI «Өнеріміз саған, Қазақстан!» атты облыстық көркемөнерпаздардың халық шығармашылығы байқау-фестивалінің қазылар алқасы Жангелдин ауданында болып, өнерпаздардың өнерін тамашалады.
Облыстың әр аудан, қаласында өтіп жатқан байқауға Жангелдин ауданы да барынша дайындалған. Аудандық Мәдениет үйіне жақында келген жаңа басшы Алмас Нұрлан сахнаға шығатын әр нөмірді пысықтап, жаңа леп берген.
Аудан өнерпаздары өте жоғары деңгейде өнер көрсетіп, қазылар алқасының көңілінен шықты. Жекелей атап айтар болсақ, «Халық» театрының әртістері «Шақшақ Жәнібек» қойылымынан үзінді қойды. Арайлым Әлібаева Қазанғаптың «18 жасар Балжан қызды» нақышына келтіре орындап берді. Алмас Нұрлан Ескендір Хасанғалиевтің «Айналдым елім» әнін әуелетті. Сонымен қатар Фариза Бүркітбай халық әні «Желкілдекті», «Қазақия» этно ансамблі «Қолбасшы» нөмірін ерекше әзірлеген. Қыз-жігіттерден құралған топ Мейірбек Молдабековтің «Қайдасың?» шығармасын жүректерге жеткізе білді. Жалпы концерт жоғары деңгейде өтті.
– Осы уақытқа дейін біраз аудан, қалаларды араладық. Әр өңірдің өзіндік ерекшелігі бар. Сахналық киім үлгілері, техникалық қолдау, нөмірді таңдау, орындау да өнерпаздың шеберлігі мен басшылардың ұйымдастыруына байланысты. Жангелдин ауданы да жоғарыдан көріне білді. Жиналған халық та қошемет көрсетіп, риза болып жатыр, – дейді облыстық халық шығармашылы мен кинобейнеқор орталығының басшысы Дәмер Қалқаев.
