Автокөліктің кілтін берді

ХХХVI «Өнеріміз саған, Қазақстан!» атты облыстық көркемөнерпаздардың халық шығармашылығы байқау-фестивалінің қазылар алқасы Рудный қаласына барып, өнерпаздардың жылдық қорытынды концертін тамашалады.

Іс-шараның мақсаты – халық өнерін насихаттау, ұлттық бірегейлікті сақтау және мәдени мұраны, көркемөнерпаздардың халық шығармашылығының барлық түрлері мен жанрларын дамыту, шығармашылық ұжымдар мен орындаушыларды анықтау және қолдау.

Аталмыш қаланың мәдениет саласы жоғары деңгейде. Дайындық барысы да ойдағыдай. Сахна төріне әнші, биші, өнерпаздар шығып, өнерлерін көрсетіп, елдің ықыласына бөленді. Дайындық барысы да қазылар алқасының көңілінен шығып, жоғары бағаға ие болды.

«Аққу» және «Жизель» би ұжымдарының «Шалқыма» композициясы, қазақ халық аспаптар оркестрінің орындауындағы күй, «Зеркало» би ұжымының «Армения» биін орындауы ерекше болды. «Жизель» үлгілі хореографиялық ұжымын қай жағынан алсақ та мақтауға тұрарлық. Сахналық киімдері, осы жолы ұсынған «Гусеница» кубан биі сахнаның көркін ашты. Сонымен қатар «Дебют» эстрадалық заманауи би ұжымы да «Никогда» заманауи биімен көрерменнің көңілінен шығып, серпін берді. Мұқан Ноғаев та «Кім білген?» әнін тамаша орындап шықты. Мұның бәрі де басшылық тараптан қолдау болғанның арқасында десе де болады. Сахналық киім, техника, мықты мамандар болған жерде сапа да болары сөзсіз. Рудный қаласының әкімі В.Ионенко концертке қатысып, қалалық мәдениет бөліміне автокөліктің кілтін табыс етті.

Сахнаға сән беріп, өнерсүйер қауымның көңілінен шыққан орындаушыларға қолдау болғаны қуантады.