Іргеде жатқан Алтынсарин ауданында ХХХVI «Өнеріміз саған, Қазақстан!» атты облыстық көркемөнерпаздардың халық шығармашылығы байқау-фестивалі жалғасын тапты.
Аудан әкімі Арнұр Сартов өзі бас болып, концертке бастан аяқ қатысып, қолдау көрсетті. Аудан әкімінің орынбасары Әділбек Сарин де өз саласына жауаптылықпен қарайтынын көрдік. Басшылық тарапынан мәдениет саласына деген қолдау жақсы. Биыл қаражат бөлініп, сахналық киімдер, ұлттық аспаптардың барлығы да жаңадан алынған. Оның бәрі де концертке рең беріп, ажарын ашты.
Аудан өнерпаздары өте жоғары деңгейде өнер көрсетіп, қазылар алқасының көңілінен шықты. Жекелей атап айтар болсақ, «Мұрагер» халық ансамблінің сүйемелдеуімен әнші Гүлбақыт Жаңбырбаева «Қостанай жыры» әнін нақышына келтіре орындады. «Аманат» тобы жетігенмен қазақ халық әндерінен попурриді тарту етті. Юлия Сизухина «Слово о матери», «Тұран-Торғай» тобы «Түркі әлемі» шығармасын орындауы да ерекше болды. Сонымен қатар аудандық мәдениет үйінің вокалдық тобы қазіргі хит болып жатқан қазақша әндерден попурри құрастырып, ұтымды жеткізе білді. Олардың «Алтынсарин ауданының әнұранын» орындауы да көптің көңілін өтерді. Жалпы байқау өңір мәдениетінің жоғары дейгейде екенін көрсетті. Оған халық та, қазылар алқасы да оң бағасын берді. Байқауға дайындық деңгейі де ойдағыдай.
Осындай шараның жоғары деңгейде өтуіне мұрындық болған аудан басшыларына, аудандық мәдениет бөлімінің басшысы Гүлжан Имановаға, барша өнер ұжымына, әріптестерімізге алғыс айтамыз.
