Меңдіқара ауданында ХХХVI «Өнеріміз саған, Қазақстан!» атты облыстық көркемөнерпаздардың халық шығармашылығы байқау-фестивалі өте жоғары деңгейде өтті.
Аудан өнерпаздары концертті Меңдіқара ауданының тумаларына арнады. Аудандық мәдениет бөлімінің басшысы Жанат Тәженованың басшылығымен барша өнер иелері жан-жақты, тыңғылықты дайындалған. Олардың еңбегі сахна төрінде көрініп, қазылар алқасы оң бағасын берді.
«Ауыл өнер кеніші» демекші, бұл өңірден шыққан таланттар жетерлік. Осы аға толқынның жолын басып келе жатқан кейінгі ұрпақ та өздерінің тегін еместіктерін көрсетті. Жылдық жұмыстың қорытындысы шығарылған шараға аудан халқы да риза болды. Көрерменнің көңілінен шығуға тырысқандарды қазылар алқасы да жоғары бағалады. Атап айтар болсақ, жергілікті әнші, Мәдениет үйінің директоры Достияр Қайдаров «Домбыра сазы» қазақ ұлт-аспаптар ансамблінің сүйемелдеуімен «Елге сапар» әнін орындады. Ансамбль мүшелері Ш.Қорғанбектің Бекзат Саттархановты еске алуға арналған «Дара тұлға» атты шығармасын жүректерге жеткізе білді. М.Нұрмұхамбетов, Б.Қожасағиев және А.Адаевтардың домбырашылар триосы күй тартыс орындап залды қыздырды. Гүлжан Нұрмұхамбет «Амели» көркем фильмінің саундтрэгін орындауы да ерекше әсер қалдырды. «Болатовтар» отбасылық ансамблі «Іңкәр сезім» әнін, аудандық мәдениет үйінің көркемдік жетекшісі Байдос Қожасағиев «Өздерің білер Нартаймын» термесін әуелетті.
Жалпы байқау өңір мәдениетінің жоғары дейгейде екенін көрсете білді. Оған халық та, қазылар алқасы да оң бағасын берді.
– Сахнаға сән беріп, өнерсүйер қауымның көңілінен шығып жүрген өнер ұжымдары және жекелеген әншілердің де аз емес екенін сезіне білдік. Дайындық деңгейі, техникалық қолдау, сахна мәдениеті үйлесім тапты. Бұл – концерт барысында өте маңызды, – дейді қазылар алқасының мүшесі, облыстық халық шығармашылық орталығының басшысы Дәмер Қалқаев.
Осындай шараның жоғары деңгейде өтуіне мұрындық болған аудан басшыларына, аудандық мәдениет бөлімінің басшысы Жанат Тәженоваға, аудандық Мәдениет үйінің директоры Достияр Қайдаровқа, барша өнер ұжымына, әріптестерімізге алғыс айтамыз.
