Дәстүрлі ХХХVI «Өнеріміз саған, Қазақстан!» атты облыстық көркемөнерпаздардың халық шығармашылығы байқау-фестивалі Сарыкөл ауданында жалғасын тапты.
Аудан өнерпаздары байқауға жан-жақты, ерекше дайындалған. Қонақтарды қазақтың ізгілікті дәстүрі бойынша шашу шашып, киіз үй құрып қарсы алды. Аудандық кітапхана ұжымы аудан өңірінің тарихынан мәлімет беретін түрлі жәдігерлерге толы көрмені ашты. Аудандық Мәдениет үйіне жаңадан келген басшы Нұрлан Байшиннің бастамасымен атқарылған істерге қазылар алқасы оң бағасын берді.
Жаңа таланттарға жол ашып, жылдық жұмыстың қорытындысы шығарылған шарадан жаңаша леп сезіледі. Әр шығармашылық ұжым көрерменнің көңілінен шығуға тырысты. Қазылар алқасына жергілікті өнерпаздар ұсынған концерттік бағдарлама ұнады. Әсіресе «Руханият» театр ұжымының «Барақ батыр» көрінісі, аудандық Мәдениет үйінің қазақ халық аспаптар ансамблінің солисті – Нағашыбай Ыбырайдың орындауындағы «Маралдым» әні ерекше болды. Біржан салдың әні «Көкекті» домбырашылар ансамблі, жетекшісі әрі орныдаушысы Талғат Әлғожин нақышына келтіріп орындап берді. Мәдениет үйінің басшысы Нұрлан Байшин «Кештім бе әлде махаббат сынақтарын?» атты Павел Неруданың Фариза Оңғарсынова аударған поэзиялық шыңармасын шеберлікпен оқып берді. Маяк ауылдық клубының «Сударушка» және «Задоринка» қасықпен ойнаушылар ансамбльдері «Русская плясовая» әнін орындауы да өте жақсы болды. Концертті Абай Сейдахметтің «Отаным қазақ елі» әнімен аяқтауы да жүрекке жетті. Көпке көтеріңкі көңіл-күй сыйлаған мәдени шараға көпшілік риза болды.
– Өнер көрсеткендердің барлығы жоғары марапатқа лайық десе де болады. Бұл өнерпаздардың тыңғылықты, әр нөмірді жауапкершілікпен дайындай білгенінің нәтижесі. Сахнаға сән беріп, өнерсүйер қауымның көңілінен шығып жүрген өнер ұжымдары және жекелеген әншілердің де аз емес екенін сезіне білдік, – дейді қазылар алқасының мүшесі, облыстық халық шығармашылық орталығының басшысы Дәмер Қалқаев.
Осындай шараның жоғары деңгейде өтуіне мұрындық болған аудан басшыларына, аудандық мәдениет бөлімінің басшысы Нұрсұлтан Шуленовке, Нұрлан Байшин бастаған өнер ұжымына, барша әріптестерімізге алғыс айтамыз.
