Мәдениет - елдің мәртебесі. Ел Тәуелсіздігінің отыз жылдығына арналған «Өнеріміз саған, Қазақстан!» атты 34-ші облыстық көркемөнерпаздардың шығармашылық фестивалі бұдан әрі Жітіқара мен Қамысты аудандарында жалғасты.

Дәстүрлі доданың үздіктерін анықтау мақсатында ұйымдастырылған байқаудың кезекті көріністеріне тілшіміз куә болды.

Жітіқара ауданының мәдениет қызметкерлері барынша өздерінің өнерін ортаға салып, көрермен мен қазылар алқасының көнілінен шығуға тырысты. Және олардың бұл мақсаттары орындалғандай. Дәстүрлі өнер мен заманауи әуен үйлесін тапқан кешке көрермен де, қазылар алқасы да жоғары баға берді. Көркемөнерпаздар шығармашылығын тамашалаған жергілікті жұрт ыстық ықыластарын білдіріп, қошеметтерін аямады.

Өнерпаздардың тыңғылықты дайындықтары әрбір әрекетінен көрініп-ақ тұр. Аудандық мәдениет үйінің қасынан тігілген күйіз үй, көрмеге қойылған көздің жауын алатын ұлттық киімдер ерекше әсер сыйлайды. Байқауға қатысушы ұл-қыздардың Қазақстанның жетістігін бейнелеген көрінісі төрешілер назарын өзіне аудармай қоймады.

Жас таланттарға жол ашу мақсатында ұйымдатырылған байқау биылғы жылдың басты оқиғаларының бірі, ел егемендігінің отыз жылдық мерейтойына арналды. Сол себепті, сахна төрінде орындалған туындылардың дені туған жер, туған ел тақырыбын қамтыды. Ән мен жырдан шашу шашылған шарадан көрермендерді былай қойғанда, өнерпаздардың өздері ләззат алғандарын айтады.

Қамысты ауданының өнерпаздары мәдениет саласының қоғамдағы алар орыны орасан екенін айқын аңғартты. Оған дәлел – әр орындалған шығармаға қошемет көрсеткен көрермен қауым. Өнер иелеріне қиқулап қолдау көрсету олардың шабытын шалқыта түсері даусыз.

Тәуелсіздіктің 30 жылдық мерейтойын арқау еткен байқау басталғалы, бірнеше аудан азаматтары өнер көрсетіп үлгерді. Іріктеуден өткен ұжымдар алдағы аймақтық деңгейдегі додада бақ сынасу мүкіндігіне ие болды.