Қостанай облысында Тәуелсіздіктің 30 жылдығына арналған «Өнеріміз саған, Қазақстан!» атты ХХХІV облыстық көркемөнерпаздардың халық шығармашылығы фестивалі өтті. Кең ауқымды іс-шараға өңірдің барлық аудан қалалары атсалысты.
Естеріңізде болса, біздің ресми сайтта әрбір аудан-қалада өткен байқау туралы шағын көлемді материалдар жарияланып отырды.
Іс-шараны қорытындылаған Мониторинг бөлімінің ақпаратынша, мәдениет думанына ұзын саны 1061 өнерпаз қатысып, фестиваль аясында 1980 көрермен қамтылған. Облысқа қарасты барлық өңір фестивальге зор жауапкершілікпен қарап, тыңғылықты дайындалғандарын көрсетіп, қай-қайсысы да жергілікті халық пен комиссия мүшелері үшін ұмытылмастай әсерлі өнер кештерін сыйлады.
Қазылар алқасының жалпылама бағалауынша, барлық аудан-қаланың сахна шеберлері концерттік бағдарламалары арқылы Тәуелсіздік тойына тамаша тарту жасап, тақырыпты жан-жақты аша алды.
Әлемді жайлаған пандемия кесірінен дәстүрлі фестивальді өткізу бірер жылға тоқтағаны баршаға мәлім. Осы уақытша үзіліске қарамастан, өнерпаздар деңгейінің өскенін айтып отыр ұйымдастырушылар. Үміт үдесінен шығып, талғам биігінен көріну үшін кім-кім де бар мүмкіндіктерін сахна төрінде паш етіп, лайықты бағаларын алған. Дәстүрлі өнердің жаңғырғаны да, жаңашыл бағыттардың да өңір өнерпаздардың бойына сіңісті бола бастағаны, фестивальді ескі сарынмен қабылдаудың етек алғаны айқын аңғарылды.
Фестивальдің жоғары деңгейде өтуіне үлкен үлес қосқан әр өңір басшылығына разылық білдіруге болады.
Өйткені олар жергілікті мәдениет қызметкерлерімен, өнер иелерімен бірлесе отырып, өз өлкелерінің намысын қорғауға барлық күш-жігерлерін жұмылдырды. Тағы бір тәнті еткен, этно ұжымдар қатары арта түскен. Ұлт өнеріне көптеп ден қойыла бастағаны қуантады.
Сондай-ақ, облыстық Мәдениет басқармасы басшысының орынбасары Сәуле Әзімжанова бастаған әділқазылар алқасына ерекше алғыс сезімін білдіреміз. Өйткені осы команда фестиваль басталған күннен-ақ, ай бойы облыстың әр өңірін аралап жүріп, әр өнерпаздың лайықты бағаларын беру үшін табанды жұмыс істеді. Қарасы қалың қатысушылардың ішінен үздіктерді іріктеп, саралап алу оңай еңбек емес екенін түсінеміз. Енді осы өнер жарысында үздік нәтиже көрсеткен жеңімпаздарды марапаттауға арналған қорытынды кеш өткелі отыр.
Жалпы,өңір өнерпаздарын ынталандыруды, шығармашылықтарына демеу беруді көздейтін фестиваль жыл сайын жалғасын тауып, облыс мәдениетін дамытуға зор септігін тигізе береді деп сенеміз!
Қадірменді әріптестер, баршаңызды байқаудың ойдағыдай аяқталуымен шын жүректен құттықтаймыз!
