ӨЛКЕЛЕРДЕ ӨНЕР ФЕСТИВАЛІ ЖАЛҒАСУДА: Ел Тәуелсіздігінің 30 жылдығына арналған 34- «Өнеріміз саған, Қазақстан!» атты облыстық көркемөнерпаздардың халық шығармашылығы фестивалі Сарыкөл мен Қостанай ауданында жалғасты. Жаңа таланттарға жол ашып, жылдық жұмыстың нәтижесі назарға ұсынылған шараға тілшіміз куә болып қайтты.

Ән айту, музыкалық аспаптарда ойнау, мың бұрала би билеу, көркем оқу. Қазылар алқасының айтуынша, осы өнер туындыларын орындаушылардың арасынан ең дарынды дегенді таңдау мүмкін емес, бәрі марапатқа лайық. Ауданда Тәуелсіздіктің 30 жылдығына орай ұйымдастырылған шығармашылық фестиваліне осындай жоғары баға берілді. Себебі дайындық тыңғылықты жүргізілген.

Елдегі эпид ахуалға байланысты 2 жылға жуық жергілікті жұрт шығармашылыққа сусап қалған еді, бұл жолғы байқау көптің көңілін бір серпілтіп тастады. Әсіресе, аға буын өкілдері ескі де, есті әндер тыңдап, құлақ құрышын қандырғандарын жасырмайды. Оларға мұңдай мүмкіндікті жергілікті өнер ұжымыдары ұсынды.

Қысқасы, қазылар алқасына жергілікті өнерпаздар ұсынған концерттік бағдарлама ұнады. Көптеген орындаушы көптің қошеметіне ие болып, төрешілер тарапынан жоғары баға алды. Іріктеуден өткен ұжымдар облыстық деңгейде ұйымдастырылатын қорытынды концертке жолдама алды.

Көркемөнерпаздар фестивалінде Қостанай ауданының өнер майталмандары қалың көрермен жүрегіне жол таба білді. Әсіресе, екі гимнасттың цирк өнері ешкімді де бей-жай қалдырмады. Әуе гимнастикасы әдемі ғана емес, көрермендер атап өткендей, бұл керемет сиқыр. Гимнасттар физиканың барлық мүмкін заңдарын бұзып, ауада қалқып жүргендей.

Қостанай ауданының өнерпаздары көрермен қауымды тек гимнастикамен таңдай қақтырған жоқ. Бұл өлкеде де күміс көмей әншілер мен төкпе күй мен шертпе күйді қатар орындайтын домбырашылар жетерлік. Эстрада жанрында ән шырқағандар тұрғындарды билетпей қоймады.