Фестиваль өнер мерекесі ғана емес, сонымен қатар түрлі ұлт пен мәдениетті тоғыстыратын достық пен бірліктің жарқын көрінісі. Фестиваль аясында көрермендер ұлттық және заманауи билердің әсем үйлесімін тамашалап, әр елдің мәдени ерекшелігімен таныса алады. Аталмыш ізгі іс-шараның негізін қалаушы, Қазақстан Республикасының еңбек сіңірген қайраткері Шәміл Фахрутдинов. Оның бастамасымен өмірге келген бұл фестиваль бүгінгі таңда халықаралық деңгейдегі беделді мәдени алаңға айналып отыр.

 
Фестиваль тарихында 91 балалар мен жасөспірімдер хореографиялық ұжымы қатысып, мыңнан астам жас өнерпаз сахна төрінде өнер көрсетіпті. Әр жылдары фестивальге ТМД және жақын шетел елдердің үздік би ұжымдары – Ресей Федерациясы, Беларусь, Украина, Грузия, Армения, Әзербайжан, Башқұртстан, Татарстан, Өзбекстан, Қырғызстан, Молдова, Солтүстік Осетия және Қазақстан Республикасынан келген шығармашылық топтар қатысып, өз өнерлерін паш еткен. 

 
Кештің салтанатты ашылуында облыс әкімінің орынбасары Бақытжан Нарымбетова сөз сөйлеп, фестиваль қатысушыларына шығармашылық табыс пен сәттілік тіледі. Ол өз сөзінде мұндай халықаралық мәдени шаралардың өңірдің рухани дамуына, жастардың шығармашылық әлеуетін арттыруға зор үлес қосатынын атап өтті.

Биыл да шетелден келген өнерпаздар Жастар сарайы сахнасында екі күн қатарынан өнер көрсетпек. Фестиваль бағдарламасында ұлттық және заманауи хореография бағыттары қамтылып, көрермендерге ерекше әсер сыйлайтын жарқын қойылымдар ұсынылады.