Халықаралық «Наурыз достарын шақырады» хореографиялық өнер фестивалі екі күн бойы қаламызды думанға бөледі

Алтыншы рет ұйымдастырылған бұл ауқымды шараға Қырғызстан, Башқұртстан, Ресей Федерациясы және Қазақстанның әр өңірінен би ұжымдары қатысып, қазақ, қырғыз, башқұрт, орыс және өзге де халықтардың би өнерін паш етті.

Биылғы фестиваль ерекше көріністерімен, ұлттық нақыштағы киім үлгілерімен және әсем хореографиялық қойылымдарымен есте қалды.

Фестивальдің басты мақсаты – халықтар арасындағы достықты нығайту, ұлттық би өнерін дәріптеу және бишілердің тәжірибе алмасуына мүмкіндік жасау. Қатысушылар дәстүрлі және заманауи билерді сахналап, көрермендерді ерекше әсерге бөледі.

Фестивальдің соңғы күні барлық қатысушылардың басын қосқан гала-концертпен қорытындыланды. Шара соңында өнерпаздарды облыстық мәдениет басқармасы басшысының орынбасары Саят Жүсіпов пен облыстық білім басқармасы басшысының орынбасары Данагүл Сүйіндікова марапаттап, фестивальге қатысушыларға алғыстарын білдірді. Олар би өнерінің ұлттар арасындағы мәдени байланысты нығайтудағы маңызын атап өтті.

Посмотреть эту публикацию в Instagram

Публикация от Culture Qostanai (@culture_qostanai)

Сондай-ақ, өнер ұжымдарының басын қосып, осындай думанды кеш өткізуге мұрындық болған Шәмел Фахрутдиновке ерекше алғысымызды айтамыз. Ол өз ісіне деген шынайы ықыласы мен қажырлы еңбегінің арқасында фестивальдің сәтті ұйымдастырылуына зор үлес қосты. Шәмел Фахрутдиновке мықты денсаулық, шығармашылық табыс және қажымас қайрат тілейміз!

Қолдау көрсеткен облыстық мәдениет ұжымдары мен Қостанай қаласындағы білім ошақтарына алғыс айтамыз!

«Наурыз достарын шақырады» фестивалі би өнеріне деген қызығушылықты арттырып, әр елден келген бишілердің өзара достық байланысын нығайтуға зор үлес қосты. Бұл игі бастама болашақта да өз жалғасын тауып, өнерсүйер қауымды әдемі кештермен қуанта береді деген сенімдеміз.