«Күйшілер одағы» Республикалық қоғамдық бірлестігі 2021 жылдың 15-19 наурыз аралығында «Шәкірт тәрбиелеудегі күй үйретудің методикалық ерекшеліктері» тақырыбында музыка мектептері мен колледждегі домбыра пәні бойынша сабақ беретін ұстаздарға арналған курс өткізді.
Курстың алғашқы күні ҚР еңбек сіңірген қайраткері, профессор Тоқтағанов Айтжан Есенұлы төкпе күйлердің орындалу ерекшеліктері жөнінде тәжірибелік сабақ көрсетті. Сүйінбай атындағы Алматы облыстық филармониясы «Ақжауын» камералық оркестрінің артисі, Н.Назарбаев зияткерлік мектебінің домбыра аспабы оқытушысы Барлықов Ертай Ғабдылхақұлы Алтай-Тарбағатай және Жетісу күйшілік мектебі күйлерінің орындалу мәнеріне тоқталып, өз тәжірибесін ортаға салды.
ҚР еңбек сіңірген қайраткерлері, профессорлар Ысқақов Біләл Алпанұлы мен Жүзбаев Жанғали Әлімханұлы Тәттімбет, Қаратау күйшілік мектебі тақырыбында шеберлік сағатын өткізіп, тәжірибе жүзінде ұстаздарға шертпе күйдегі оң және сол қол қойылымдары жөнінде түсіндірді. Музыка мектептерінде шертпе күйді нешінші сыныптан бастау керектігі айтылып, ұстаздар өз ойларын ортаға салды.
ҚР еңбек сіңірген әртісі, «Құрмет» ордені иегері Айдарбаева Роза Тайманқызы Маңғыстау күйшілік мектебі бойынша айтыс күйлердің тарихымен таныстыра отырып, шебер орындап көрсетіп, ұстаз үшін орындаушылық шеберліктің маңыздылығын айтып өтті. Сертеков Нұржан Орынғалиұлы Орда күйшілік мектебі жөнінде, Қазақ ұлттық өнер университетінің аға оқытушысы, доцент, Қазанғаптанушы Еділ Басығараев Қазанғап күйшілік мектебі тақырыбында кең көлемде дәріс берді.
Дәулеткерей атындағы қазақ халық аспаптары оркестрінің бас дирижеры, Құрмет орденінің иегері, Мәдениет саласының үздігі Нұрымбетов Еркін Шаяхметұлы Сыр өңірі, Әлшекей күйшілік мектебі тақырыбында және музыкалық мектептер мен колледждерде оркестр, ансамблдерді жүргізу мәселелеріне тоқталып, авторлық партитуралық жинақтарын, ғылыми кітаптарын ұстаздарға өз жұмыстарына қолдануға ұсынды.
Курстың соңғы күні Күйшілер одағының басшысы Д.Нұрпейісова атындағы балалар саз мектебінің домбыра аспабының оқытушысы, «Орал сазы» фольклорлық ансамблінің жетекшісі, педагогика ғылымдарының магистрі, Кенжеғалиев Асқар Мұхамбетқалиұлы «Күйшілер одағы» РҚБ жұмыс жоспары, оқытушылар мен шәкірттерге арнайы өткізілетін одақтың жұмысы, Онлайн сабақтарды өткізуді ұйымдастыру жөнінде өз тәжірибесімен бөлісіп, әдістемелік ұсыныстарын айтып өтті.
Қазақ Ұлттық Өнер Университетінің «Музыкалық білім беру» кафедрасының оқытушысы, Педагогика ғылымдарының магистрі, PhD докторанты Кожебаев Дархан Ержанұлы күй өнерінде «Музыкалық өлкетану» жөнінде айтып, күй үйретуде ұстаздың зерттеушілік қызметінің маңыздылығына тоқталды.
Елімізге белгілі күйшілер, профессор оқытушылар курс барысында күйшілік өнердегі әр өңірдің мектептерінің қалыптасуы, оның негізін қалаушылары және дамуы жайында айта отырып, авторлық ғылыми еңбектерімен таныстырып, әр күйшілік мектептің орындаушылық мәнеріне талдау жасап, ерекшеліктеріне тоқталды. Курсқа әр өңірден 60 тан астам ұстаздар қатысып, күй үйрету жөнінде өз пікірлерімен бөлісіп, теориялық, тәжірибелік жағынан тың мәліметтер алды.
Қостанай өңірінен аталған курсқа аудан, қалалардан өнер мектептерінің және колледж ұстаздары қатысты. Қостанай облысы әкімдігі мәдениет басқармасының облыстық көркемөнерпаздардың халық шығармашылығы мен кинобейнеқор орталығының қызметкері, магистр Ж.Жармағанбетова, Майлин ауданы, өнер мектебінің оқытушысы А.Бейбітхан қатысып, курстан алған әсерлерін өз қызметтестерімен бөлісті.
«Күйшілер одағы» Республикалық қоғамдық бірлестігін «Шәкірт тәрбиелеудегі күй үйретудің методикалық ерекшеліктері» курсының сәтті өтуімен құттықтап, шығармашылық табыстар тілейміз.
