Жырау, домбырашы, профессор, фольклортанушы Алмас Алматов Қостанайда. Қазақтың жыраулық өнерін өшірмей осы күнде жас өскіннің бойына дарытып-ақ жүрген қайраткер шеберлік сабағын өткізді.
Нұржан Наушабайұылының 160 жылдығына байланысты Қазақстанның өзге өңірлерінен және облысымыздың әр түкпірінен дәстүрлі әншілер жиналды.
Бұған дейін де хабарлағанымыздай, қазанның 16-17 аралығында «Арқада Наушабайдың Нұржаны өткен...» атты І республикалық дәстүрлі ән орындаушыларының байқауы өтеді. Бүгін бірінші кезең басталады.
Тақтақ ақынның шығармашылығын бұрқыратпаққа келген жас талаптар абыздың ақылына құлақ түрді.
Жырды, дастанды, толғауды жаттап алу мен сіңіріп алудың ара-жігі бар, - деп бастады келесі бір ойын Алмас Алматов.- Мәселен, «Теміртас»! Біз үшін бірер ауыз ғана өлең болуы мүмкін, ал задында мән-мазмұнына терең бойлар болсақ, тұтас ғұмыр жатыр. «Ләйлім», «Мақпал» сынды туындыларды айтам да, осынау керемет жауһарларды жазып кеткен мықтыларың ХІХ ғасыр мен ХХ ғасырда ғана өткен. Ал қыз сұлулығын әспеттеудегі әндемді бір құдырет, терең философияның дәргейіне көп жағдайда жете бермейміз. Қазіргі күндері «клип», «бейнеклип» деп жатады, әлгі әндердің сүйемелдеуіш құралдарын.
Біле-білсеңіздер, жолдастар, Ақанның, Мәдидің, Нұржанның, Кененнің бір-бір туындысының өзі жеке фильмге татитын қою дүние. Сондықтан, бәленбай ауыз туындыны тұтастай судыратып жаттағаннан бір қайтарымын болса да, түйсікпен қабылдап, қауымға паш еткеннің құны артық қашанда.
Алмас Нұрмаханұлы жас өскіндермен жүздесуде Ұлттық университеттің қабырғасында 1998 жылы Дәстүрлі өнер кафедрасының қалай ашылғаны хақында аз-кем тебіренді.
Жыраудың айтысына қарағанда, сол кезгі министр Қырымбек Көшербаевтың бекітуімен, Алматыдағы атағы дардай оқу ордасында қазақтың төл өнерінің тұлпарларын баптаудың біссімілләсі басталған екен.
Қадірлі достар, жас өскін таланттар, сіздердің мойындарыңызда үлкен миссия бар, былайғы тілмен айтқанда.
- Жырау әңгімесін осылайша діттеген арнасына бұрды. -
Ғасырлар бойы қалыптасып, даланың, бабаның зарын, мұңын, қуанышын, миятын дарытқан орасан бай дүниені өлтіріп алмау керек. Баба мұраны бүлдірмей келешекке аманаттау – ортақ парыз, міндет!
Кездесу барысында Алмекең «Көроғлы» қаһармандық халық эпосының үзіндісін орындап, айналасындағыларды байырғы бекзат өнердің кемесіне мінгізіп, тылсым әлемге күмп берді. Жергілікті өнерпаздар да жырдан шашу шашты.
Жиын соңында әр қатысушыға сертификат табысталды.
Нұрқанат Нүсіпхан
