Мемлекет басшысының шешімімен мемлекеттік наградалар тізімі «Шәмші Қалдаяқов» медалімен және «Қазақстанның еңбек сіңірген суретшісі» құрметті атағымен толықты.
Бұл – ұлттық музыка, бейнелеу өнері және жалпы мәдениет саласының дамуына елеулі үлес қосып жүрген шығармашылық иелерінің еңбегін мемлекеттік деңгейде бағалаудың маңызды қадамы.
ҚР Премьер-Министрінің орынбасары – Мәдениет және ақпарат министрі Аида Балаева бұл шешім үшін Мемлекет басшысына мәдениет саласы өкілдері атынан алғысын білдірді.
«Сіздермен қуанышқа толы жақсы жаңалықты бөліскім келеді. Бүгін Президент мемлекеттік наградалар тізіміне «Шәмші Қалдаяқов» медалі мен «Қазақстанның еңбек сіңірген суретшісі» құрметті атағын енгізу туралы шешім қабылдады. Мәдениет пен өнер саласы үшін маңызды әрі көптен күткен осынау шешім үшін еліміздің бүкіл мәдениет саласы өкілдері атынан Мемлекет басшысына шынайы алғысымды білдіремін! Бұл мәні зор шешім – мәдениет пен өнердің қоғамдағы мәртебесін арттыруға, осы салаға бар ғұмырын арнаған азаматтардың еңбегін лайықты бағалауға бағытталған жүйелі мемлекеттік саясаттың жалғасы деп білемін», – деді ҚР Премьер-Министрінің орынбасары – Мәдениет және ақпарат министрі Аида Балаева.
Бүгінде еліміздің мәдениет саласында 56 мыңнан астам маман еңбек етеді. Елімізде 85 театр, 286 музей, 67 концерттік ұйым және 3054 мәдени-демалыс ұйымы жұмыс істейді. Бұл сандардың артында ұлттық мәдениеттің дамуына талмай еңбек етіп жүрген қаншама адамның қажырлы қызметі тұр. Олардың еселі еңбегі ұлттық өнерді өркендетіп, мәдени мұрамызды сақтап, оны кейінгі ұрпаққа жеткізуге қызмет етіп келеді. Сондықтан мұндай еңбек мемлекеттік деңгейде лайықты бағалануға тиіс екені сөзсіз.
«Бүгінгі шешімге жаңа Конституцияның қабылдануы да ерекше мән береді. Тарихи-мәдени мұраны сақтау және ұлттық мәдениетті қолдау алғаш рет мемлекеттің негізгі қағидаттарының қатарына қосылып, конституциялық деңгейде бекітілді. Президент атап өткендей, енді мәдениет саласын қолдау – мемлекеттің конституциялық міндеті. Бұл норма қазірдің өзінде нақты мазмұнмен толығып келеді», – деп Аида Балаева атап өткендей, кейінгі бес жылда мәдениет қызметкерлерінің жалақысы екі есе өсті.
Биылдан бастап өнер қайраткерлеріне берілетін мемлекеттік стипендиялардың көлемі де екі есе артты. Жыл сайын мұндай стипендияны 75 азамат алады.
Мемлекет басшысының қолдауымен мәдениет ұйымдарының қызметкерлеріне 260 пәтер берілді. Оның 200-і Астана қаласында болса, 60 пәтер Алматы қаласында табысталды. Биыл тек Мәдениет пен өнер қызметкерлері күніне орай мемлекеттік наградалармен жүзден астам әріптесіміз марапатталды.
Мемлекеттік деңгейдегі бағалау жүйесі де кезең-кезеңімен жаңарып келеді. «Халық әртісі» құрметті атағы отыз жылдан кейін қайта жаңғыртылды. Енді бұл тізім «Шәмші Қалдаяқов» медалі және «Қазақстанның еңбек сіңірген суретшісі» құрметті атағымен толықты.
Шәмші Қалдаяқов атындағы медаль ұлттық музыканы, композиторлық пен орындаушылық өнерді дамытуға елеулі үлес қосып жүрген азаматтардың еңбегіне берілетін жоғары баға болмақ.
Ал «Қазақстанның еңбек сіңірген суретшісі» құрметті атағы ұлттық бейнелеу өнерінің дамуына елеулі үлес қосқан суретшілердің, графиктердің, мүсіншілердің және басқа да бейнелеу өнері өкілдерінің еңбегін мемлекеттік деңгейде лайықты бағалауға мүмкіндік береді.
Жаңа марапаттар – Президенттің мәдениет саласына деген айрықша назарын және өнер адамдарына жан-жақты қолдауын тағы бір дәлелдей түсетіндей.
Бұл өнер адамадарының көп жылғы шығармашылық еңбегінің лайықты бағасы болып, мәдениет саласының жаңа буынына тың серпін берері сөзсіз. Олардың көп жылғы еңбегіне лайықты баға беріп қана қоймай, ұлттық мәдениетті дамытуға жаңа серпін беретін маңызды бастама.
Мәдениет – ұлттың рухани тірегі. Өнерге көрсетілген қолдау – елдің болашағына жасалған инвестиция.
