Қала орталығындағы Жаңару саябағында Ұлттық домбыра күні және Астана күні аталып өтті. Тұрғындар назарына концерттік бағдарлама ұсынылды.
Бағдарлама құттықтау лебіздерімен басталды. Айтулы мерекелер тоғысында Қостанай ауданы әкімінің орынбасары Жұматай Кәкімжанов қала тұрғындарына ізгі тілегін арнады.
— «Баршаңызды Астана күнімен және Ұлттық домбыра күнімен шын жүректен құттықтаймын. Елордамыз қазіргі таңда әлемге әйгілі қалалардың бірі екені бәрімізге мәлім. Еуразия кіндігіндегі күн сәулелі Астана жаһан жанарын тіккен жауһар шаһарға, мақтанышымызға айналды. Ал асыл домбырамыз, Мемлекет басшысы айтқандай, қазақтың жаны, байтақ даланың үні. Ол арқылы ұлттық құндылығымызды дәріптеп, мәдениетімізді насихаттап келеміз. Киелі домбыра қазақы болмысымыздың сипаты ретінде әлемге паш болып отыр. Қастерлі мерекелеріміз құтты болсын!» – деді Жұматай Кәкімжанов.
Тобылдықтардың думанды сәтіне облыстық Көркемөнерпаздардың халық шығармашылығы және кинобейнеқор орталығының басшысы Дәмер Қалқаев мейман болып барып, жүрекжарды лебізін айтып, домбырамен күй орындап берді.
— «Домбыра күніне дайындық облыста ерте басталды. 5 маусымнан бастап, бір ай көлемінде барлық аудан-қалада, әр ауылда үлкен іс-шаралар өтті. Бұл – біздің қара домбырамызға деген ерекше құрметіміз. Ежелден қуаныш-қайғысын, шер-мұңын қос ішекке сыйдырған ұлттың ұрпағымыз. Сондықтан киелі аспаптың қадірі арта берсін. Осындай іс-шараға ұйытқы болған аудан басшылығына, жергілікті өнерпаздарға мың алғыс», – деді Дәмер Қалқаев.
Осыдан соң «Алтын дән» аудандық мәдениет үйінің шығармашылық ұжымы әуеленіп ән айтып, күмбірлетіп күй төгіп, мың бұрала би билеп, көрерменнің қошеметіне бөленді.
