QOSTANAI TAŃY: «Туған жердің тарланы». Ақын Ақылбек Шаяхметтің мерейтойлық қорытынды кеші Қостанайда өтті
Ақын, жазушы, драматург, көсемсөз шебері Ақылбек Шаяхметтің 75 жас мерейтойы Қостанай төрінде түйінделді. Көрікті кеш Жастар сарайында өтіп, ардақты тұлғаға мейлінше құрмет көрсетілді. Жеңіл автокөлік сыйға тартылып, төсбелгімен марапатталды.
Қабырғалы қаламгерді қастер тұтқан қалың қауым әуелі ғимарат фойесіне жайылған шығармашылық көрмені тамашалады. Одан соң басты залды лық толтырып, кеш иесін қоғадай жапырылып қарсы алды. Ақынның жоғары беделін құрметтеп, бұл салтанатты кешке елдің әр өңірінен және шет мемлекеттерден құрметті меймандар арнайы келген. Солардың басында Қазақстан Республикасы Президентінің кеңесшісі Мәлік Отарбаев бар. Ол Мемлекет басшысының мерейтой иесіне және барша қостанайлық қауымға жолдаған дұғай сәлемін жеткізіп, өзінің де жүрекжарды лебізін арнады.
«Ардақты Ақылбек Қожаұлы, сізді айтулы белесіңіз 75 жылдық мерейтойыңызбен шын жүректен құттықтаймын. Сіз туған жерден табан аудармай, қасиетті Қостанай өңірінде өнімді еңбек етіп, аймақтың ғана емес, тұтас еліміздің әдебиеті мен мәдениетін байытуға зор үлес қосып келесіз. Сіздің қазақ сөз өнеріне сіңірген өлшеусіз еңбегіңіздің айғағы ретінде ел-жұртыңыз бен әдеби орта жоғары бағалап, құрмет көрсетті. Мемлекет басшысы Қасым-Жомарт Тоқаев «Ел болашағы үшін оқитын ұлт қалыптастырудың, оның ішінде отандық әдебиетті дамытудың маңызын үнемі алға қояды. Сіз осы стратегиялық бағытқа үн қосып жүрген қаламгерсіз. Руханият майданындағы шығармашылық шабытыңыз ешқашан сарқылмасын!» – деді Мәлік Отарбаев.
Ол Қасым-Жомарт Кемелұлының арнайы құттықтауы мен алғысын табыстап, «Алтын барыс» төсбелгісімен марапаттады. Облыс басшысы Құмар Ақсақалов да арқаның арқалы ақынын ыстық ықыласын жеткізіп, тамаша сый жасады.
«Ақылбек Қожаұлы – ұлттық әдебиетімізде өзіндік қолтаңба қалдырған көрнекті тұлға. Бала күнінен қасиетті қаламды жанына серік етіп келе жатыр. Бүгінгі күні ақиқат жырларымен үлкен қоғам қайраткеріне айналды. Ол – тек сыршыл ақын ғана емес, ұлтының жоғын жоқтаған нағыз қайраткер. Жерлесіміз халықаралық деңгейде мойындалған сан қырлы қаламгер. Бүгінде шығармалары түркі әлемінің ортақ рухани қазынасына айналды. Талай жырлары көрнекті ақын-жазушылар тарапынан зор баға алуы – осы сөзімнің айқын дәлелі. Бұл мерейтой бір ғана облыстың емес, барша қазаққа ортақ мереке!» – деді облыс әкімі Құмар Ақсақалов.
Кештің ең бір елеулі сәті өңір басшысының Ақылбек ағамызға «КІА Sportage» маркалы автокөлік тарту етуі болды.
«Халқымыз ежелден ақынын ардақтаған. Біз де салттан жығылмай, осы мерейлі сәтте мерейтой иесіне ерекше сый ретінде автокөлікті табыстауға рұқсат етіңіздер. Бұл тарту – сіздің ұлттық әдебиет пен мәдениетті дамыту жолындағы өлшеусіз еңбегіңізге көрсетілген құрмет пен халық қалауы, азаматтардың қолдауы деп білерсіздер» – деп ілтипат білдірді облыс әкімі.
Бұл рухани іс-шараның халықаралық мәнге ие болғанын да ерекшелеп айту керек. Өйткені шығармашылық кешке Әзірбайжан елінің қаламгері, аудармашы Ильгар Тюркоглы және Қырғызстанның қарымды жазушысы Жолдашбек Монолдоров, түркі дүниесінің рухани байланысын нығайтып жүрген көрнекті ақын, «Түрксой» халықаралық жазушылар одағының төрағасы Ұлықбек Есдәулет арнайы келіп қатысып, тілек-лебіз айтып, тарту-таралғыларын жасады.
Бір айта кетерлігі – жетпіс кітап жазған ақынның сөресі тағы үш жинақпен толығып отыр. Олар – балаларға арналған «Ақылды ара» еңбегі, «Көңілдегі көрікті сөздер» афоризмдер жинағы және әзірбайжан тіліне аударылып отырған «Құлып туралы ақиқат» деп аталатын жыр кітабы. Ақылбек ағамыз ақтарыла сөз сөйлеп, жарқылдап жыр оқып, халыққа бас иіп алғысын айтты.
Кеште Ақылбек ағаның өлеңдері оқылып, сөзіне жазылған әндер әуеледі, театр ойылымынан үзінді көрсетілді.
Іс-шарадан соң мерейтой иесіне су жаңа темір тұлпардың кілті салтанатты жағдайда табыс етілді.
Толығырақ газеттің алдағы санынан оқи аласыздар.
Ж.Балғынбекұлы
Суреттерді түсірген – Бердіболат КӨРКЕМБАЕВ
