Облыс орталығында өткен халықаралық «Алтын микрофон» ән байқауының қорытындысы шығарылды. Дәстүрге айналған дүбірлі додада биыл бас жүлдені Болгария елінен келген жезтаңдай әнші жеңіп алды. Осымен 16-шы рет ұйымдастырылып отырған ән аламанына 15 мемлекеттің өнерпаздары қатысты. 70-ке жуық жас дарындар жарысында бабы келісіп, бағы жанғандар жеңіс тұғырынан көрінді.

Бірінен-бірі өткен балғындар бәйгесінің қорытындысын шығару қазылар алқасына зор қиындық тудырды. Әрбір әнші өзіндік ерекшелігімен басым. Бірінде жоқ өзгешелік екіншісінен табылып жатса, келесі қатысушының келісті қасиеті жүлделі орынды бөліп беруді талап етеді. Бір сөзбен айтсақ, шешім шығару оңайға соқпады. Себебі, биылғы ән байқауының деңгейі де, қатысушылардың шеберліктері де жоғары болды, - дейді қазылар алқасының төрағасы. Тобылдық әншілердің де шетелдік өнертанушыларды тәнті еткенін айтпай кетуге болмайды. 

Әрбір топтың үздіктері анықталған аламанда қанжығасы майланбаған қатысушы қалмады. Барлық үміткерлер ұйымдастырушылар атынан сый-ситяпатқа ие болды. Бірақ, бәйге болған соң, алдына жан салмаған жүйрікті анықтау - шарт. Биылғы байқаудың бас жүлдесі болгариялық Сесил Сабри атты жас әншіге бұйырды. Әлемге әйгілі ән аламаны әлі талай тың таланттарды танытады. Әншілердің әліппесіне айналған «Алтын микрофон» байқауының басты мақсаты да - осы.