Қазақтың кең даласын әнге бөлеп, ұлт мақтанышына айналған дарын иесі Шәмші Қалдаяқовтың ең соңғы туындысы – «Отырардағы той» әні.
Отырар ауданының 60 жылдық тойы болған кезде сазгер төсек тартып жатқан екен. Ауыр дертіне қарамастан өзінің кіндік қаны тамған жері Отырарды әнге қосып, туған өлкесіне деген ыстық ықыласын әнмен жеткізгендей болады.
Абай атындағы Қазақ ұлттық педагогикалық университетінің профессоры, педагогика ғылымдарының докторы Бақтияр Смановтың жаңа жазбаларынан: «Еліміз тәуелсіздік алғаннан кейін Шәмші шығармашылығының бағы жаңаша жанды.
Елбасымыз Н.Ә.Назарбаев Ш.Қалдаяқовтың ересен еңбегіне үлкен жанашырлық танытты. Президент Шәкең шығармашылығына байланысты үш бірдей Жарлыққа қол қойды. Елбасының бірінші Жарлығымен оған «Қазақстанның халық әртісі» құрметті атағы (1991 ж.) берілсе, екінші Жарлығымен композитордың «Менің Қазақстаным» шығармасы Әнұранға (2006 ж.) айналды, ал үшінші Жарлығымен Шәмші Мемлекеттік сыйлықтың лауреаты (2010 ж.) атанды. Дара дарынның әндерінің республикалық, халықаралық байқаулары мен ән фестивальдарын өткізу дәстүрге айналды. Бұл орайда, Шәмші шығармашылығын насихаттаудағы белгілі шәмшітанушы, композитор Қалдыбек Құрманәлінің тынымсыз еңбегін атаған жөн. Шәмшінің туған жері Шәуілдірге, облыс орталығы Шымкентке ескерткіштері қойылып, мұражайларын ашу мемлекеттік дәрежеде қолға алынды.
Шырайлы Шымқалада Ш.Қалдаяқов атындағы саябақ ашылып, кезінде оның өзі жұмыс істеген Оңтүстік Қазақстан облыстық филармониясына, Алматы, Астана, Шымкент секілді үлкен шаһарлардағы көшелерге есімі берілді. Туған ауылы - бұрынғы «Темір» кеңшары - «Шәмші ауылы» деп аталды. Ал Ақтөбе облысының Қарғалы ауданында «Шәмші Қалдаяқов ауылы» өмірге келді.
Ән шамшырағының өмірі мен шығармашылығына арналған үлкенді-кішілі еңбектер жазылуда. Әндерінің толық жинақтары, ол туралы естеліктер кітап болып басылуда».
Міне, осындай игілікті істердің барлығы ұлы композитордың халқымен бірге мәңгі жасай беретінін көрсетеді.
