Тұңғыш рет облысымызда «Тіл – рухани қазына» атты маңызы зор іс шара өтті. Ұйымдастырушы – облыстық Тілдерді дамыту басқармасы. Мақсат – мемлекеттік тіл саясатын жүргізуде тер төгіп жүрген азаматтардың еңбегін елеп, марапаттау. Айтулы шараға облыс әкімі Архимед Бегежанұлы қатысты. Алты аталым бойынша ең үздік деген мамандар қошемет пен ақшалай тартуларға ие болды.
Облыстық Тілдерді дамыту басқармасының мұрындық болуымен өткен шарада қазақ тілінің мәртебесіне ерекше екпін қойылды. Ана тіліміздің қазіргі уақыттағы беделі мен әлеумет арасындағы қатынас құралы миссиясының арта түсуіне шама-шарқынша үлес қосып жүрген ұжымдар мен жекелеген азаматтардың еңбектері еленді.
- Бұл ауқымы кең шараны тұңғыш рет ұйымдастырып отырмыз, - дейді Тілдерді дамыту басқармасы бөлімінің басшысы Бақытгүл Сүлейменова. - Маңызы ерек бастаманы ҚР халқының тілдері күніне орай қолға алдық. Өздеріңіз байқағандай мерекелік шараның өн бойында өзге этнос өкілдері ана тілдерінде әндер орындап, шараның әрін келтірді. Ең маңызды бөлігі – жыл басында түрлі аталымдар бойынша Қостанай облысы әкімінің премиясын жариялаған болатынбыз. Міне, үздіктерді бүгін дүйім елдің алдында марапаттап, қошеметке кенелттік.
Салтанаты мен мазмұны ерек бастаманың барысында, сондай-ақ, ҚР Спорт және мәдениет министрлігінің және Қостанай облысы әкімінің құрмет грамоталарына ие болған бірқатар өңір азаматтарының да мерейлері үстем болды. Барлығы, облыс әкімінің премиясына ие болғандармен қоса есептегенде, жиырма адам марапатталды. «Қанатты қалам» аталымында бағы мен бабы басым түскен «Қостанай таңы» газетінің веб-редакторы - Жандос Жүсіпбеков.
- Тілдерді дамыту басқармасының бұл шарасы өзінің ауқымымен және мазмұндылығымен тәнті етті, - деп бастады Жандос Балғынбекұлы. - Облыс баспасөзінің қарашаңырағы "Қостанай таңы" газетінде ана тілімізді насихаттауға бағытталған бірнеше арнайы жоба бар. Айталық, "Сөз әлемі", "Көрген көзде жазық жоқ", "Сөз асылы" сынды айдарлар өз оқырмандарын тапқан деп сеніммен айта аламыз. Бұлардың қатарына биыл "Кел, емле үйренейік" және "Латынворд" мүйістері қосылған болатын. Бұл айдарлардың қызметі – латыннегізді әліпбиді насихаттау, оқырмандарға жаңа емле ережелерін ежіктеп үйрету. Мінекей, облыс бойынша ең алғашқы болып ашылған осы жобаны байқауға қатыстырып, арнайы қазылардың лайықты бағасын алды. Қазақтың жазу тарихындағы жаңа бастамаға үн қосуды көздеген бұл жоба әлі жалғасын табады.
Ұйымдастырушы тараптың сөзіне сенсек, айтылмыш шара келесі жылы да жалғасын табады.
Нұрқанат Нүсіпхан
суреттерді түсірген - Бердіболат Көркембаев
