Қамысты аудандық мәдениет үйінің жанынан жаңа өнер ұжымы – «Жайылма» халық театры құрылды. Бұл бастама аудан әкімдігінің қолдауымен жүзеге асырылып, kpi бағдарламасына сәйкес өмірге келді. Театрдың көркемдік жетекшісі – аудандық мәдениет үйінің директоры Еркебұлан Кәрімұлы.
Театр құрамына өнерге жаны құмар, әртүрлі мамандық иелері енді. Олардың қатарында домбыра үйірмесінің жетекшісі Мәди Байзақов, музыка пәнінің мұғалімі Асылхан Байжан, қазақ тілі пәнінің мұғалімі Толқын Айтымағанбетова, математика пәнінің мұғалімі Ақбидай Жеңісхан, ағылшын тілі пәнінің мұғалімі Дильяра Әлмұхамедова, мәдениет үйінің көркемдік жетекшісі Самал Мырзабекова және ақпарат бөлімінің әдіскері Ермек Төлебергенов бар. Бұл әртістердің барлығы театр өнеріне ерекше қызығушылық танытып, сахнада өздерін жаңа қырынан көрсетуге ниетті.
Қазіргі таңда театр ұжымы белгілі жазушы-драматург Лидия Егембердиеваның «Көресіні көрмей...» шығармасын сахналауға қызу дайындық жүргізіп жатыр. Бұл пьеса қоғамдағы өзекті мәселелерді қозғап, көрермендерге ой салатын қойылым болмақ. Алғашқы премьера сәуір айының ортасына жоспарланып, аудан тұрғындары мен қонақтарына ұсынылады.
– Жастарды өнерге тарту, Қамысты мәдениетінің дамуына үлес қосу мақсатында театр құрылды. Қазір құрамда бірнеше мұғалім бар. Алдағы уақытта театрға қосылғысы келетіндер көбейеді деп сенеміз. Бұл – шығармашылық әлеуетті арттыруға, ұлттық мәдениетті дәріптеуге бағытталған үлкен қадам, – дейді театр жетекшісі Еркебұлан Кәрімұлы.
Театрдың сахналық безендірілуі мен әртістердің киімдері облыстық қазақ драма театрының қолдауымен және жергілікті тұрғындардың көмегімен дайындалуда. Бұл өнер ұжымының құрылғанына көп уақыт өтпесе де, аудан жұртшылығы тарапынан үлкен қолдауға ие болғанын көрсетеді.
«Жайылма» театрының атауы Қамысты ауданының байырғы атауы – Жайылма жеріне байланысты қойылған. Бұл атау ауданның тарихи тамыры мен мәдени мұрасын айшықтап, театрдың рухани құндылықтарды жаңғыртуға бағытталғанын аңғартады.
Алдағы уақытта театр ұжымы жаңа қойылымдар әзірлеп, Қамысты ғана емес, облыс деңгейінде өнер көрсетуді жоспарлап отыр. Бұл бастама ауылдық жерде театр өнерін дамытуға тың серпін беріп, шығармашылыққа құштар жандарға жаңа мүмкіндік ашады.
