Ақсақалдың ғибратты ғұмыры тереңдігімен мәнді. Соғыстан кейінгі саналы ғұмырын сахнаға арнаған ардагер, ұлт руханиятына өшпес із қалдырған. Тұла бойына өнер тұнған Қасымхан қария алғаш рет 13 жасында аудандық мәдениет үйінің сахнасында өнер көрсеткен екен. Сұрапыл соғыстан оралған соң жыраулық пен айтыскерлік өнердің өр биігіне шығады. Сан қырлы саңлақ Жітіқара жерінде тұңғыш көркемөнерпаздар үйірмесін ұйымдастырып, домбыра оркестрін құрған. Талай айтыста аламанға түсіп, өрелі өнер бәйгелерінде топ жарған адуынды ақын, абыз ақсақал. 1959 мен 1979 жылдар аралығында Қостанайда алты рет облыстық ақындар айтысы өткізілсе соның төртеуінде Қасымхан Алдабергенов топ жарып, жеңімпаз тұғырына көтеріліпті. Абайдың «Масғұт», «Ескендір» поэмаларын оқыған әуезді үні де өз алдына бір төбе.
Қаламы жүйрік журналист. Ұлағатты ұстаз, сегіз қырлы, бір сырлы Қасымхан ата өмір бойы өнер әлемін өрнектеп келеді. Ғибратты ғұмыры келер ұрпақ үшін өмірлік өнеге.
Әлі күнге дейін қолынан қаламы түскен емес. Ғибратқа толы әңгімелері қандай. Тоқсанның тоғызына жеткен тау тұлғаны Облыстық халық шығармашылығы орталығы мамандары құттықтап, қуантып, батасын алып қайтты. Ортамызда болыңыз Қасымхан ата! Деніңіз сау, Алла берген жасты жасай беріңіз.
