#REPOST @arqalyqmurajai «Шертер» ансамблі 1974 жылы Торғай облысы филармониясының жанынан ұйымдастырылып, Арқалық қаласында құрылды
Ансамбльде тұңғыш рет қазақтың көне халық музыкалық аспаптары шертер, жетіген, сырнай, шаңқобыз, асатаяқ, қамыс сырнай, т.б. пайдаланылды. Yш ішекті шертпелі көне музыкалық аспап шертер ансамбльдегі басты аспап саналды. Ансамбльдің құрылуына, ондағы музыкалық аспаптардың қайта айналымға енуіне Өзбекәлі Жәнібеков пен музыкатанушы, өнертану ғылымдарының кандидаты Сарыбаев Болат Шамғалиұлы өз үлестерін қосты. Ансамбль репертуарынан сирек орындалатын қазақтың халық музыкалық шығармалары (терме, күй, ән мен билер) кең орын алды.
Ансамбльдің тұңғыш көркемдік жетекшісі, ҚР Мәдениет қайраткері «Құрмет» орденінің иегері, күйші, композитор Қайыржан Мақанов (1974 – 78) болса, музыкалық жетекшісі ҚР еңбек сіңірген әртісі Ғалымжан Құрманов (1978 жылдан) болды. Ансамбль құрамында ҚР еңбек сіңірген әртісі, биші Тойған Ізім, ҚР мәдениет қайраткерлері Отаркүл Мұқатова, Айтжан Настаева, Қыпшақ Қойғарин, Сайлау Ордабаев, Ханша Оспанова, К.Бірмағамбетова, Сапар Әбенов т.б. болды.
Гастрольдік сапармен ансамбль ұжымы Қазақстанның жер-жерлерінде, Алматы қаласында, сондай-ақ ТМД елдерінде, алыс шет елдерде болып өнер көрсетті.
«Шертердің» үлгісімен Амангелді ауданында «Торғай толқындары», Жангелдин ауданында «Ғасырлар пернесі» атты этнографиялық ансамблдер құрылып халыққа қызмет етті.
