2016 жылдың 29 қарашада «Облыстық көркемөнерпаздар халық шығармашылығы орталығы» КМҚК Ілияс Омаров атындағы облыстық қазақ драма театрында жыршы-термешілердің кезекті облыстық семинары болып өтті.

Семинар мақсаты- ұлттық жанрлар терме-жыршылық, дәстүрлі өнерді жаңғырту, өңірімізде дамуына бағдар жасау, шығармашылық тәжірибе алмасу.

Семинар бағдарламасында «Жыршылық өнер, терме, толғау» жөнінде елімізге танымал жыршы, қарт майдангер Қасымхан Алдабергенов кеңінен тоқталып, мақам мәселесі жөнінде ой өрбітті. Одан кейін ұстаз, Халықаралық байқаулардың лауреаты Азамат Мұқатов дәстүрлі ән жөнінде ауқымды ақпарат беріп, Ақан серінің «Балқадиша» әнін және Ахмет Байтұрсыновтың «Аққұм» әнін түрлі иірімдермен орындап, дәстүрлі әннің қыр-сыры жөнінде баяндады. Жыршы, термеші Қыдырбек Қиысхан Сегіз серінің әнін, Естайдың «Қорланын» нақышына келтіре орындап, терме мақамы мен қазақ күйлерінің байланыстары жөнінде сыр шертіп, мысалдар келтірді. Семинарда Торғайдағы жыршылық мектептің өкілі, әйгілі жыршы термеші Сардан Әбікеевтың шығармасы, мақамы тыңдалып, тыңдармандарды тәнті етті. Жыршының таспаға жазылып алынған даусы облыстық халық шығармашылық орталығының жүргізген фольклорлық экспедицияның нәтижесі болатын. Жуырда Алматы қаласында өткізілген республикалық «Текті сөздің төресі - терме» атты термешілер байқауының лауреаты Мұрат Нағашыбай өз пікірін айтты. Тәжірибелік семинар барысында Қостанай өңірінде даму үшін осы бағыттағы өнер ортасы керек екендігі жөнінде ой қозғады. Қатысушылар тарапынан сұрақтар қойылып, тұщымды жауап алынды.

Семинарға қатысушылар Қостанай облысында жыршылық, термешілік, әншілік өнерді дамытуда мынадай ұсыныстарды атап өтті:

Өзге өңірлерде өткізілетін республикалық байқауларға қатысып отыру;

Қостанайдан жыршы-термешілер мектебін ашу;

Халықаралық жыршы-термешілер одағымен тығыз байланыста болу;

Қостанайда жыршы-термешілер байқауларын, фестивакльдерін ұйымдастыру;

Астана қаласында Өнер академиясында терме, жыр өнері бойынша курстарға өз өңіріміздің өнерпаздарын жіберу;




Семинарға қатысушылар саны: 35 адам.

Облыстық «Қостанай таңы» газеті, республикалық «Қазақ радиосы» ақпараттық қолдау көрсетті.