Қазанның 16-17 аралығында Қостанай ауданын қазақтың хас та, бекзат өнерінің үні әлдиледі! Әр түкпірден келген үміткерлер бабында екенін дәлелдеп бақты.
Мәдениет үйінің сахнасынан дауыс зорайтқыштың (микрофон) көмегінсіз шырқалған әрбір ән тыңдарманының жүрегіне ұялап жатты. Оны қауымның көзі, аракідік қиқулдап қойған үндері айтты.
Екінші кезең 17 қазанда 11.00-де, Қостанай ауданының қақ ортасындағы «Алтын дән» МҮ өтті. Тақтақ ақынның рухын, шығармашылығын жаңғыртпаққа арналған аламанның нүктесі қойылды.
Естеріңізге сала кетейік, қазылар құрамына бес адам енді. Төрағасы - Қазақ ұлттық өнер университетінің «Дəстүрлі əн» кафедрасының профессоры, Қазақстанның еңбек сіңірген қайраткері, фольклоршы-ғалым, «Парасат» орденінің иегері Алматов Алмасбек Нұрмаханұлы. Сондай-ақ ғаділін айтқан құрамда ақын, филология ғылымдарының кандидаты, Ахмет Байтұрсынов атындағы ҚМУ профессоры, ҚР мәдениет қайраткері Шаяхмет Ақылбек Қожаұлы, халықаралық және республикалық байқаулардың лауреаты, Қостанай Меценаттар клубы сыйлығының иегері, Е.Өмірзақов атындағы облыстық филармонияның әншісі Кәдіров Манапбек Сапарбайұлы мен Халықаралық және республикалық байқаулардың лауреаты, Қостанай Меценаттар клубы сыйлығының лауреаты, Е.Өмірзақов атындағы облыстық филармонияның көркемдік жетекшісі Байназаров Батырбек Қасымұлы болды.
Қазақ өнерінің қанатын кең жайып, дамуына үлес қосқан, әрі байқауға қатысқаны үшін бірқатар өнерпаздарға арнайы диплом мен 20 мың теңгенің сертификаттары табысталды.
ІІІ орынға Назира Бейсенова (Көкшетау), Жанат Мінайдар (Қостанай ауданы) және Мәлібеков Сағынбай (Жезқазған) ие болып, 100 мың теңгеден ұтып алды.
Семейлік Мұқашев Таңат пен елорда намысын қорғаған Зекенов Ақылтай ІІ орыннан көрініп, 200 мың теңгеден жүлдеге ие болды.
Алматыдан келген Зарина Рахманбердиеваның өнері І орынға лайықты деп танылып, арнайы диплом мен 300 мың теңгенің сертификатын еншіледі.
Бабымен де, бағымен де басым болған Фархад Жәкіш (Нұр-Сұлтан) бас жүлдені ұтып алып, 500 мың теңгеге ие болды. Бас марапатты облыстық Мәдениет басқармасының басшысы Ерлан Болатұлы табыстады.
Жүлдеге іліккен жетеу кезек-мезек тыңдарманын ән әлемінің әсеріне бөлеп, құдіретті өнердің бесігінде әлдиледі.
Айта кету керек, барлық қатысушы өз өңірлеріне құнды дүниелерді ала кетті. Нұржан Наушабайұылының дауысы жазылған, өз орындауындағы дүниелері таспаланған күйтабақтар құнды жәдігер ретінде он бес өнерпазға аманатталды.
Нұрқанат Нүсіпхан
