Сатирик-жазушы, этнограф-ғалым, қазақы қалжыңының хас шебері, «Қыр елінің Крыловы» атанған Сейіт Кенжеахметов атындағы «Мірдің оғы» республикалық әзіл-сықақ театрлары арасында өтетін байқау-фестивалі Қостанай ауданы, Тобыл қаласы «Алтын дән» мәдениет үйінде бастау алды.
Фестивальді облыстық мәдениет басқармасының басшысы Ерлан Қалмақов ашты.
— Бүгін біз Сейіт ағамыздың атындағы дәстүрге айналып үлгерген сатира фестиваліне жиналып отырмыз. Үлкен өнерді арқалап келіп отырған ұжымдар мен жеке орындаушылар бүгінгі фестивальдің деңгейін асқақтатып отыр. Үш-төрт ұжымның қатысуымен ғана басталған байқау бүгінде ауқымын кеңейтіп, еліміздің түкпір-түкпірінен келіп жатқан өнер ұжымдарымен қанатын жайды. Олар Сейіт ағамыздың рухына тағзым ете отырып, сәл кенжелеп қалған сатира өнерінің қайта жандануына үлестерін қосады деп сенеміз. Себебі, сатира - үлкен өнер. Сейіт ағамыз тек сатирик қана емес, қазақ халқының мұрасын зерттеп, зерделеуге зор үлесін қосқан азамат. Ол кісінің мұрасын насихаттау баршамызға ортақ парыз. Осы фестиваль Сейіт ағамызға деген сый құрметтің бір көрінісі, - дей келе Ерлан Болатұлы қазылар алқасында төрелік етіп отырған белгілі азаматтарға, барша қатысушыларға алғысын білдіріп, сәттілік тіледі.
Облысымызда үшінші мәрте республикалық деңгейде өтіп жатқан фестивальге 6 облыстан 10 әзіл-сықақ театры келді. Әр театр екі қойылым ұсынады. Алғашқы күні Сейіт Кенжеахметов ағамыздың шығармаларынан көрініс қойса, келер күні еркін тақырыпта болады.
Байқау-фестиваліне төрелік ететін тұрақты төраға қалжыңның қыранына айналған, Қазақстан Республикасы мәдениет саласының үздігі, Президент сыйлығының, халықаралық «Алаш» әдеби сыйлығының лауреаты Көпен Әмірбеков ағамыз. Онымен қоса Қазақстанның еңбек сіңірген қайраткері, «ТТТ» театрының директоры Асылбек Боранбаев, жазушы-сатирик, Қазақстан Республикасының мәдениет қайраткері, «Екі езу» театрының көркемдік жетекшісі Нұрлыбек Жұбатқан да қазылар алқасының құрамында.
Сейіт ағамыздың ұрпақтарынан қызы, белгілі ұстаз-ғалым, Ы.Алтынсарин атындағы медальдің иегері, «Жеті қазына» этнопедагогика бойынша бағдарлама авторы, «Әлем көшбасшысы» құрметті атағының иегері, Астана қаласының 59 мектеп-лицей директорының ғылыми-әдістемелік жұмыс бойынша орынбасары Зәмзагүл Кенжеахметова да фестивальдің қонағы болды.
Кешке «Екі езу» театрының көркемдік жетекшісі Нұрлыбек Жұбатқан «Күлкі қайдан шығады?» тақырыбында шеберлік сабағын өткізді.
Бүгін сағат 10:00 фествальдің екінші кезеңі және сағат 13:00 жеңімпаздарды марапаттау рәсімі өтеді.
