#REPOST @qostanai_tany - Қостанай облысында «Мерейлі отбасы – 2026» ұлттық байқауының облыстық кезеңі қорытындыланды. Биыл өңірдің барлық аймағынан 98 отбасы бақ сынады
🥇 Бас жүлде Арқалық қаласының Биекиндер отбасына бұйырды. Қапар Шайсұлтанұлы мен Жұлдызай Әбілхайырова 53 жыл отасып, төрт бала тәрбиелеп, 14 немере сүйіп отырған өнегелі шаңырақ. Отбасы адал еңбегі, білімге ұмтылысы және қоғам өміріне белсенді араласуымен ерекшеленді. Енді Биекиндер отбасы облыс намысын республикалық кезеңде қорғайды. Жеңімпаздарға 1 миллион теңге сертификат табысталды.
Биыл байқауға алғаш рет үш арнайы номинация енгізілді. Марапаттау рәсімінде Қостанай облысы әкімінің орынбасары Бақытжан Нарымбетов жеңімпаздар мен барлық қатысушыларды құттықтап, отбасының қоғамдағы маңызына тоқталды.
✨ «Ұрпақ сабақтастығын ұлықтаған отбасы» номинациясын Әбдрахман Нағашыбайұлы мен Әйгерім Қайбарқызының отбасы иеленді. Жеті бала тәрбиелеп отырған әулетте Торғайға танымал жыршы-термеші Нағашыбай Алпысовтан басталған өнер дәстүрі ұрпақтан-ұрпаққа жалғасып келеді. Үлкен ұлы Мұхаммед-Рахым да сахнада өнер көрсетіп жүр.
🏅 «Ұстаздық пен спорттың ұлағатты әулеті» номинациясы Б.Майлин ауданының Горбенко әулетіне берілді. Әулеттің педагогикалық еңбек өтілі – 67 жыл, спорттағы жалпы тәжірибесі – 168 жыл. Ұстаз әрі жаттықтырушы Владимир Горбенконың өнегесі кейінгі ұрпаққа жалғасып келеді.
🇰🇿 «Отанға қызмет – отбасы құндылығы» номинациясының жеңімпазы – Лисаковск қаласының Бектановтар отбасы. Ерлан мен Ботагөз 25 жыл отасып, үш бала тәрбиелеп отыр. Екі ұлы ел қызметінде: бірі прокурордың көмекшісі, екіншісі Қарулы күштер офицері. Кіші қыздары да білім мен спортта белсенді.
Сонымен қатар Амангелді ауданынан Нұрқановтар отбасы, Әулиекөл ауданынан Оспановтар отбасы және Рудный қаласынан Алиевтер отбасы марапатталғандар қатарынан көрінді.
Марапаттау рәсімінде облыс әкімінің орынбасары Бақытжан Нарымбетов отбасының қоғамдағы орнына тоқталып, бала тәрбиесі мен ұлттық құндылықтардың маңызын атап өтті. Ол биыл байқауға жүзге жуық өнегелі шаңырақтың қатысқанын айтып, отбасы институтын нығайтуға бағытталған бастамалардың жалғаса беретінін жеткізді.
